అఖండ-2 టికెట్ ధరల పెంపునకు ఏపీ సర్కార్ గ్రీన్ సిగ్నల్

నటసింహం నందమూరి బాలకృష్ణ, మాస్ డైరెక్టర్ బోయపాటి శ్రీను కాంబినేషన్‌లో వస్తున్న భారీ చిత్రం 'అఖండ-2 తాండవం'. ఈ సినిమా టికెట్ల ధరలను పెంచుకునేందుకు ఆంధ్రప్రదేశ్ ప్రభుత్వం అనుమతి మంజూరు చేసింది. డిసెంబర్ 5న సినిమా విడుదల కానున్న నేపథ్యంలో, 10 రోజుల పాటు పెరిగిన ధరలతో టికెట్లు విక్రయించుకునేందుకు చిత్ర యూనిట్‌కు వెసులుబాటు కల్పించింది.

ప్రభుత్వ ఉత్తర్వుల ప్రకారం, డిసెంబర్ 5వ తేదీ నుంచి మల్టీప్లెక్స్‌లలో టికెట్‌పై రూ.100, సింగిల్ స్క్రీన్ థియేటర్లలో రూ.75 అదనంగా వసూలు చేసుకోవచ్చు. ఈ పెరిగిన ధరలు పది రోజుల పాటు అమల్లో ఉంటాయి. ప్రపంచవ్యాప్తంగా సినిమా విడుదలయ్యే ఒకరోజు ముందుగా, అంటే డిసెంబర్ 4వ తేదీ రాత్రి 8 గంటలకు ప్రత్యేక ప్రీమియర్ షోను ప్రదర్శించనున్నారు. ఈ స్పెషల్ షో కోసం టికెట్ ధరను రూ.600గా నిర్ణయించారు.

'అఖండ' చిత్రానికి సీక్వెల్‌గా వస్తున్న ఈ సినిమాపై అభిమానుల్లో భారీ అంచనాలు నెలకొని ఉన్నాయి. 14 రీల్స్ ప్లస్ పతాకంపై రామ్ ఆచంట, గోపి ఆచంట ఈ చిత్రాన్ని ప్రతిష్ఠాత్మకంగా నిర్మిస్తున్నారు. తమన్ సంగీతం అందిస్తున్నారు.