ఏపీ శాసనమండలిలో కీలక పరిణామం... రాజీనామా వెనక్కి తీసుకున్న డిప్యూటీ చైర్ పర్సన్ జకియా ఖానమ్

ఆంధ్రప్రదేశ్ శాసన మండలి డిప్యూటీ ఛైర్‌పర్సన్ జకియా ఖానమ్ తన రాజీనామాను ఉపసంహరించుకున్నారు. మండలి ఛైర్మన్ కోయ్యే మోషేన్ రాజు చేసిన సూచన మేరకు ఆమె సోమవారం ఈ నిర్ణయం తీసుకున్నారు. దీంతో ఆమె తన పదవిలో యథాతథంగా కొనసాగనున్నారు.

కొన్ని రోజుల క్రితం వ్యక్తిగత కారణాలతో జకియా ఖానమ్ తన పదవికి రాజీనామా చేశారు. ఈ విషయం తెలుసుకున్న ఛైర్మన్ మోషేన్ రాజు ఆమెతో నేరుగా మాట్లాడారు. ఆమె పదవీకాలం మరో ఆరు నెలలు మాత్రమే మిగిలి ఉందని, ఇప్పుడు రాజీనామా చేస్తే కొత్త నోటిఫికేషన్ ఇచ్చి ఎన్నిక నిర్వహించడానికి సమయం ఉండదని వివరించారు. ఈ తక్కువ కాలానికి రాజీనామా చేయడం వల్ల ఎలాంటి ప్రయోజనం ఉండదని, కావున పదవిలో కొనసాగడమే సరైన నిర్ణయమని సలహా ఇచ్చారు.

ఛైర్మన్ సూచనను అంగీకరించిన జకియా ఖానమ్, తన రాజీనామాను ఉపసంహరించుకుంటున్నట్లు అధికారికంగా లేఖ అందజేశారు. ఈ లేఖను ఛైర్మన్ మోషేన్ రాజు వెంటనే ఆమోదించారు. ఈ పరిణామంతో జకియా ఖానమ్ తన మిగిలిన ఆరు నెలల పదవీకాలాన్ని పూర్తి చేయనున్నారు.