ఎక్కువసేపు మొబైల్ చూడకుంటే బహుమతి.. పంజాబ్‌లో ఆసక్తికర పోటీ

పంజాబ్ రాష్ట్రంలోని మోగా జిల్లాలో ఒక ఆసక్తికరమైన పోటీని నిర్వహిస్తున్నారు. మొబైల్ ఫోన్ చూడకుండా ఎక్కువసేపు నిలిచిన వారికి బహుమతులు ఇస్తామని ఆ జిల్లాలోని గోలియా ఖుర్ద్ గ్రామ పెద్దలు ప్రకటించారు. ఈ రోజుల్లో పిల్లలు, పెద్దలు అనే తేడా లేకుండా ప్రతి ఒక్కరూ ఫోన్ లేకుండా ఉండలేకపోతున్నారు. మొబైల్ ఫోన్ శరీరంలో ఒక భాగంగా మారిన ఈ తరుణంలో, ఫోన్ లేకుండా ఎక్కువసేపు ఉన్న వారికి బహుమతులు ప్రకటిస్తూ సరికొత్త పోటీకి శ్రీకారం చుట్టారు.

భార్యాభర్తలు, అత్తమామలు, మనవరాళ్లు, యువకులు, వృద్ధులు.. ఇలా అన్ని వయస్సుల వారు కలిపి మొత్తం 55 మంది ఈ పోటీలో పాల్గొంటున్నారు. ఈ పోటీలో పాల్గొనేవారు మొబైల్ ఫోన్ లేకుండా ఒకేచోట ఎక్కువసేపు కూర్చోవాలి. దీనికి కొన్ని నిబంధనలు కూడా ఉన్నాయి, వాటిని తప్పక పాటించాలి. ఈ పోటీలో విజేతకు ఓ సైకిల్, రూ.4,500 నగదు బహుమతి... రెండవ స్థానంలో నిలిచిన వారికి రూ.2,500, మూడవ స్థానంలో నిలిచిన వారికి రూ.1,500 నగదు బహుమతిగా అందజేస్తారు. ప్రజలను మొబైల్ ఫోన్లకు దూరంగా ఉండేలా ప్రోత్సహించడమే ఈ పోటీ యొక్క ప్రధాన ఉద్దేశం.

పోటీ నిబంధనలు:
*  మొబైల్ ఫోన్లను ఉపయోగించకూడదు.
*  పోటీ సమయంలో బయటకు వెళ్లి తినకూడదు, వాష్‌రూమ్‌కు వెళ్లకూడదు.
*  ఒకవేళ తినాలనుకుంటే కూర్చున్న చోటుకే ఆహారం, నీరు అందిస్తారు.
*  నిద్రపోకూడదు.
*  పోట్లాడుకోకూడదు, గట్టిగా మాట్లాడకూడదు.
*  పోటీ నుంచి ఎలిమినేట్ అయిన వారికి తిరిగి అవకాశం ఉండదు.
*  పుస్తకాలు చదవడం, యోగా వంటివి చేయవచ్చు.