రాపిడో డ్రైవర్ ఖాతాలో రూ. 331 కోట్లు.. ఏమిటీ మాయ!

ఎన్‌ఫోర్స్‌మెంట్ డైరెక్టరేట్ (ఈడీ) దర్యాప్తులో దిగ్భ్రాంతికరమైన విషయాలు వెలుగులోకి వచ్చాయి. ఓ సాధారణ రాపిడో బైక్ డ్రైవర్ బ్యాంకు ఖాతా నుంచి గుజరాత్‌కు చెందిన యువ రాజకీయ నేత ఆదిత్య జులాకు సంబంధించిన లగ్జరీ పెళ్లికి నిధులు అందినట్టు ఈడీ గుర్తించింది. గతేడాది నవంబర్‌లో ఉదయ్‌పూర్‌లోని తాజ్ ఆరావళి రిసార్ట్‌లో ఈ వివాహం జరగ్గా, దీనికి వాడిన నిధుల మూలాలపై ఇప్పుడు తీవ్ర అనుమానాలు వ్యక్తమవుతున్నాయి.

1xBet అక్రమ బెట్టింగ్ రాకెట్‌పై దర్యాప్తులో భాగంగా ఈడీ ఈ మనీ లాండరింగ్ గుట్టురట్టు చేసింది. 2024 ఆగస్టు నుంచి 2025 ఏప్రిల్ మధ్య కాలంలో ఆ రాపిడో డ్రైవర్ ఖాతాలో ఏకంగా రూ. 331.36 కోట్లు జమ అయినట్లు అధికారులు కనుగొన్నారు. ఈ ఖాతా నుంచి రూ. కోటికి పైగా డబ్బును ఆడంబరమైన పెళ్లి ఖర్చుల కోసం వాడారు. అయితే ఆ డ్రైవర్‌కు వధూవరులతో ఎలాంటి సంబంధం లేకపోవడం గమనార్హం.

ఈ ఖాతాను ఒక 'మ్యూల్ అకౌంట్‌'గా వాడినట్లు ఈడీ భావిస్తోంది. గుర్తుతెలియని వ్యక్తుల నుంచి డబ్బు డిపాజిట్ అవడం, వచ్చిన వెంటనే ఇతర అనుమానాస్పద ఖాతాలకు బదిలీ కావడం జరిగిపోయింది. ఈ లావాదేవీల జాడను పరిశీలించగా, వాటికి అక్రమ బెట్టింగ్ కార్యకలాపాలతో సంబంధం ఉన్నట్లు తేలింది. అసలు నిధుల మూలాలను దాచిపెట్టేందుకే ఇలా మూడో వ్యక్తి ఖాతాను వాడినట్లు అధికారులు అనుమానిస్తున్నారు.

అమాయకుల ఖాతాలను ఉపయోగించి నేరాలకు పాల్పడటం ఈ మధ్య కాలంలో పెరిగిపోయిందని, తమకు సంబంధం లేదని భావించి ఖాతా వివరాలు ఇతరులకు ఇచ్చిన వారు తర్వాత తీవ్రమైన చట్టపరమైన చిక్కుల్లో పడుతున్నారని ఓ సీనియర్ ఈడీ అధికారి హెచ్చరించారు.

ప్రజలకు ఈడీ సూచనలు 
* మీ బ్యాంకు ఖాతా వివరాలు, డెబిట్/క్రెడిట్ కార్డులు, యూపీఐ, నెట్ బ్యాంకింగ్ యాక్సెస్ వంటివి ఎవరితోనూ పంచుకోవద్దు.
* గుర్తు తెలియని వ్యక్తుల కోసం చెక్కులు లేదా ఆర్థిక పత్రాలపై సంతకాలు చేయవద్దు.
* మీ ఖాతాలో అనుమానాస్పద డిపాజిట్లు లేదా విత్‌డ్రాయల్స్ జరిగితే వెంటనే బ్యాంకుకు ఫిర్యాదు చేయండి.
* మీ ఆర్థిక గుర్తింపును వాడుకోవడానికి ఎవరైనా డబ్బు ఆఫర్ చేస్తే జాగ్రత్తగా ఉండండి.
* ప్రభుత్వ పోర్టల్ (tafcop.sancharsaathi.gov.in) ద్వారా మీ పేరు మీద ఉన్న మొబైల్ నంబర్లను తనిఖీ చేసుకొని, వాడని నంబర్లను డియాక్టివేట్ చేయండి.