ఛీఫ్ రెవెన్యూ ఆఫీసర్ కోర్సు... తొలిసారిగా ప్రారంభించిన కోల్‌కతా ఐఐఎం

దేశంలోని ప్రఖ్యాత విద్యాసంస్థ ఇండియన్ ఇన్‌స్టిట్యూట్ ఆఫ్ మేనేజ్‌మెంట్ (IIM) కోల్‌కతా, వ్యాపార రంగంలో ఒక కీలక ముందడుగు వేసింది. రెవెన్యూ, బిజినెస్ విభాగాల్లో తర్వాతి తరం నాయకులను తీర్చిదిద్దే లక్ష్యంతో దేశంలోనే మొట్టమొదటిసారిగా 'చీఫ్ రెవెన్యూ ఆఫీసర్ (CRO)' ప్రోగ్రామ్‌ను ప్రారంభించింది. 10 నెలల పాటు సాగే ఈ ఎగ్జిక్యూటివ్ కోర్సు, కంపెనీల వ్యూహరచనకు, క్షేత్రస్థాయి అమలుకు మధ్య వారధిగా నిలుస్తుందని సంస్థ పేర్కొంది.

భారతీయ కంపెనీలు ప్రపంచవ్యాప్తంగా విస్తరిస్తున్న ప్రస్తుత తరుణంలో, మార్కెటింగ్, సేల్స్, కస్టమర్ సర్వీస్, ప్రైసింగ్ వంటి కీలక విభాగాల మధ్య సమన్వయం ఎంతో అవసరం. సాధారణంగా ఈ విభాగాలు వేర్వేరుగా పనిచేయడం వల్ల సమన్వయ లోపంతో కంపెనీలు ఆదాయాన్ని కోల్పోతుంటాయి. ఈ సమస్యను అధిగమించి, అన్ని విభాగాలను ఒకే వ్యూహంతో ముందుకు నడిపించే నిపుణులను తయారు చేయడమే ఈ ప్రోగ్రామ్ ముఖ్య ఉద్దేశం.

ఆన్‌లైన్, ఆఫ్‌లైన్ పద్ధతిలో ఈ కోర్సును నిర్వహిస్తారు. ఇందులో భాగంగా ఐఐఎం కోల్‌కతా క్యాంపస్‌లో నాలుగు రోజుల పాటు ప్రత్యేక శిక్షణా తరగతులు ఉంటాయి. స్థూల ఆర్థికశాస్త్రం, బ్రాండింగ్, డిజిటల్ ట్రాన్స్‌ఫర్మేషన్, ఏఐ ఆధారిత మార్కెటింగ్, లీడర్‌షిప్ వంటి అంశాలపై నిపుణులతో శిక్షణ ఇస్తారు. ఈ కోర్సును విజయవంతంగా పూర్తి చేసిన వారికి ఐఐఎం కోల్‌కతా ఎగ్జిక్యూటివ్ ఎడ్యుకేషన్ పూర్వ విద్యార్థుల హోదా లభిస్తుంది. దీనివల్ల దేశంలోని ప్రముఖ వ్యాపారవేత్తలతో నెట్‌వర్క్ ఏర్పరచుకునే అవకాశం కలగడమే కాకుండా, వృత్తిపరంగా మంచి గుర్తింపు లభిస్తుంది.

సేల్స్, మార్కెటింగ్, ఫైనాన్స్ వంటి విభాగాల్లో పనిచేస్తున్న సీనియర్ ప్రొఫెషనల్స్ తమ నాయకత్వ సామర్థ్యాలను పెంచుకోవడానికి ఈ కోర్సు ఎంతగానో ఉపయోగపడుతుంది.