గాల్లోనే మూడు గంటల పాటు హైటెన్షన్... కేరళ స్కై డైనింగ్‌లో తప్పిన పెను ప్రమాదం

కేరళలోని ప్రసిద్ధ పర్యాటక ప్రాంతం మున్నార్‌లో శుక్రవారం సాయంత్రం తీవ్ర ఉత్కంఠభరిత ఘటన చోటుచేసుకుంది. అనచల్ ప్రాంతంలో కొత్తగా ప్రారంభించిన స్కై డైనింగ్ రెస్టారెంట్‌లో సాంకేతిక లోపం తలెత్తడంతో, ఐదుగురు వ్యక్తులు సుమారు మూడు గంటల పాటు 120 అడుగుల ఎత్తులో గాల్లోనే చిక్కుకుపోయారు. బాధితుల్లో కన్నూర్‌కు చెందిన ఒకే కుటుంబంలోని నలుగురు పర్యాటకులు, ఒక సిబ్బంది ఉన్నారు.

పర్యాటకులను గాల్లోకి తీసుకెళ్లే భారీ క్రేన్‌లో సాంకేతిక సమస్య రావడంతో ప్లాట్‌ఫామ్‌ను కిందకు దించడం సాధ్యపడలేదు. దీంతో సమాచారం అందుకున్న కేరళ ఫైర్ అండ్ రెస్క్యూ సిబ్బంది, స్థానిక అత్యవసర బృందాలు వెంటనే రంగంలోకి దిగాయి. దాదాపు మూడు గంటల పాటు శ్రమించి, చివరకు అందరినీ సురక్షితంగా కిందకు దించడంతో అధికారులు, స్థానికులు ఊపిరి పీల్చుకున్నారు. 

మున్నార్‌లో ఇటీవల ప్రారంభమైన ఈ స్కై డైనింగ్ ప్రాజెక్టు పర్యాటకులను విశేషంగా ఆకర్షిస్తోంది. ఒకేసారి 15 మందిని గాల్లోకి తీసుకెళ్లి, 30 నిమిషాల పాటు భోజనం చేస్తూ ప్రకృతిని ఆస్వాదించే అవకాశం కల్పిస్తున్నారు. అయితే, ఈ ఘటనతో సాహస పర్యాటకంలో భద్రతా ప్రమాణాలపై తీవ్ర ఆందోళనలు వ్యక్తమవుతున్నాయి. దీనిపై పూర్తిస్థాయి దర్యాప్తు జరిపి, భద్రతాపరమైన అంశాలను సమీక్షిస్తామని పర్యాటక శాఖ అధికారులు తెలిపారు. భవిష్యత్తులో ఇలాంటి సంఘటనలు పునరావృతం కాకుండా కఠినమైన భద్రతా తనిఖీలు నిర్వహిస్తామని స్థానిక యంత్రాంగం హామీ ఇచ్చింది.