ఏపీ కోస్తా జిల్లాలకు తుపాను హెచ్చరిక

నైరుతి బంగాళాఖాతంలో ఏర్పడిన 'దిత్వా' తుపాను శ్రీలంక తీరానికి సమీపంలో కొనసాగుతోందని ఆంధ్రప్రదేశ్ విపత్తుల నిర్వహణ సంస్థ తెలిపింది. దీని ప్రభావంతో రాష్ట్రంలోని కోస్తా, రాయలసీమ ప్రాంతాల్లో రాగల మూడు రోజుల్లో భారీ నుంచి అతి భారీ వర్షాలు కురిసే అవకాశం ఉందని హెచ్చరించింది. మత్స్యకారులు సముద్రంలో వేటకు వెళ్లరాదని స్పష్టమైన ఆదేశాలు జారీ చేసింది.

విపత్తుల నిర్వహణ సంస్థ వెల్లడించిన వివరాల ప్రకారం, ఈ తుపాను ప్రస్తుతం శ్రీలంకలోని ట్రింకోమలికి 170 కి.మీ., పుదుచ్చేరికి 570 కి.మీ., చెన్నైకి 670 కి.మీ. ఆగ్నేయంగా కేంద్రీకృతమై ఉంది. గత ఆరు గంటలుగా ఇది గంటకు 10 కిలోమీటర్ల వేగంతో కదులుతోందని, ఆదివారం తెల్లవారుజాము నాటికి తమిళనాడు, దక్షిణ కోస్తా తీరాలకు చేరుకునే అవకాశం ఉందని అధికారులు అంచనా వేస్తున్నారు.

తుపాను ప్రభావంతో శుక్రవారం సాయంత్రం నుంచే కోస్తా తీరం వెంబడి గంటకు 50 నుంచి 70 కిలోమీటర్ల వేగంతో బలమైన ఈదురుగాలులు వీస్తాయని తెలిపారు. శనివారం అన్నమయ్య, చిత్తూరు, తిరుపతి జిల్లాల్లో, ఆదివారం ప్రకాశం, నెల్లూరు, కడప, తిరుపతి జిల్లాల్లో భారీ నుంచి అతి భారీ వర్షాలు కురిసే అవకాశం ఉంది. అదేవిధంగా బాపట్ల, ప్రకాశం, నెల్లూరు, అనంతపురం, శ్రీసత్యసాయి, కడప జిల్లాల్లో పలుచోట్ల భారీ వర్షాలు నమోదవుతాయని పేర్కొన్నారు.

ఈ పరిస్థితుల నేపథ్యంలో ప్రజలు అప్రమత్తంగా ఉండాలని, రైతులు తమ పంటల విషయంలో తగిన జాగ్రత్తలు తీసుకోవాలని ప్రభుత్వం సూచించింది. ఏదైనా అత్యవసర సహాయం అవసరమైతే 1070, 112, 18004250101 టోల్ ఫ్రీ నంబర్లను సంప్రదించాలని విపత్తుల నిర్వహణ సంస్థ ప్రజలకు విజ్ఞప్తి చేసింది.