కమలా పసంద్ అధినేత ఇంట్లో విషాదం.. కోడలు అనుమానాస్పద మృతి

దేశవ్యాప్తంగా గుర్తింపు పొందిన పాన్ మసాలా బ్రాండ్లు ‘కమలా పసంద్’, ‘రాజ్‌శ్రీ’ అధినేత కమల్ కిశోర్ చౌరాసియా ఇంట్లో తీవ్ర విషాదం చోటుచేసుకుంది. ఆయన కోడలు దీప్తి చౌరాసియా (40) అనుమానాస్పద స్థితిలో మృతిచెందారు. దక్షిణ ఢిల్లీలోని అత్యంత విలాసవంతమైన ప్రాంతమైన వసంత్ విహార్‌లోని వారి నివాసంలో మంగళవారం మధ్యాహ్నం ఈ ఘటన జరిగింది. ఆమె ఆత్మహత్య చేసుకున్నట్లు పోలీసులు ప్రాథమికంగా భావిస్తున్నారు.

వివరాల్లోకి వెళితే.. కమల్ కిశోర్ కుమారుడు హర్‌ప్రీత్‌తో దీప్తికి 2010లో వివాహం జరిగింది. వీరికి 14 ఏళ్ల కుమారుడు ఉన్నాడు. మంగళవారం మధ్యాహ్నం ఇంట్లోని గదిలో చున్నీతో ఉరి వేసుకుని ఉన్న దీప్తిని ఆమె భర్త హర్‌ప్రీత్ గమనించారు. వెంటనే ఆమెను సఫ్దర్‌జంగ్ ఆసుపత్రికి తరలించగా, అప్పటికే మృతిచెందినట్లు వైద్యులు ధ్రువీకరించారు.

ఘటనా స్థలంలో పోలీసులకు ఒక సూసైడ్ నోట్ లభించింది. "ఒక బంధంలో ప్రేమ, నమ్మకం లేనప్పుడు ఆ జీవితానికి అర్థం ఏముంటుంది?" అని ఆ లేఖలో రాసి ఉన్నట్లు సమాచారం. తన మృతికి ఎవరూ బాధ్యులు కాదని ఆమె పేర్కొన్నట్లు తెలుస్తోంది. కుటుంబ సమస్యల కారణంగానే ఆమె ఈ తీవ్ర నిర్ణయం తీసుకుని ఉండొచ్చని పోలీసులు అనుమానిస్తున్నారు.

మృతదేహాన్ని పోస్టుమార్టం నిమిత్తం తరలించారు. శవపరీక్ష నివేదిక వచ్చిన తర్వాత మరణానికి కచ్చితమైన కారణం తెలుస్తుందని అధికారులు తెలిపారు. ఈ ఘటనపై పోలీసులు లోతుగా దర్యాప్తు చేస్తున్నారు. ఇప్పటివరకు ఈ విషయంపై చౌరాసియా కుటుంబం గానీ, పోలీసులు గానీ అధికారికంగా ఎలాంటి ప్రకటన విడుదల చేయలేదు. కాన్పూర్‌లో ఒక చిన్న దుకాణంతో పాన్ మసాలా వ్యాపారం ప్రారంభించిన కమల్ కిశోర్, ప్రస్తుతం వేల కోట్ల టర్నోవర్‌తో దేశంలోనే ప్రముఖ వ్యాపారవేత్తగా కొనసాగుతున్నారు.