ముంబైలో ధర్మేంద్ర ఫ్యామిలీని పరామర్శించిన నిర్మాత అల్లు అరవింద్

టాలీవుడ్ ప్రముఖ తెలుగు నిర్మాత అల్లు అరవింద్.. ముంబైలో నటుడు ధర్మేంద్ర కుటుంబాన్ని పరామర్శించారు. ధర్మేంద్ర నిన్న కన్నుమూసిన సంగతి తెలిసిందే. ఈ నేపథ్యంలో, ముంబైలోని ధర్మేంద్ర నివాసానికి వెళ్లిన అల్లు అరవింద్... ఆయన కుటుంబ సభ్యులను కలిసి తన ప్రగాఢ సానుభూతిని తెలియజేశారు. కారు దిగి నేరుగా డియోల్ నివాసంలోకి వెళుతున్న దృశ్యాలు మీడియాలో కనిపించాయి.

నవంబర్ 24న ధర్మేంద్ర మరణవార్త తెలియగానే పలువురు సినీ ప్రముఖులు సోషల్ మీడియా వేదికగా నివాళులర్పించారు. అల్లు అర్జున్ కూడా స్పందిస్తూ, "లెజెండరీ నటుడు ధర్మేంద్ర గారి మరణవార్త నన్ను తీవ్రంగా కలచివేసింది. ఆయన లక్షలాది హృదయాలను హత్తుకున్న ఒక దిగ్గజం. ఆయన కుటుంబానికి, మిత్రులకు, అభిమానులకు నా ప్రగాఢ సానుభూతి" అని ట్వీట్ చేశారు.

అల్లు అర్జున్‌తో పాటు మెగాస్టార్ చిరంజీవి, జూనియర్ ఎన్టీఆర్, మలయాళ సూపర్ స్టార్ మోహన్‌లాల్ వంటి దక్షిణాది అగ్రతారలు సైతం ధర్మేంద్ర మృతి పట్ల విచారం వ్యక్తం చేశారు. ఆయనతో తమకున్న అనుబంధాన్ని గుర్తుచేసుకుంటూ సోషల్ మీడియాలో పోస్టులు పెట్టారు.

ఈ ఏడాది డిసెంబర్ 8న 90వ పుట్టినరోజు జరుపుకోవాల్సి ఉండగా, 89 ఏళ్ల వయసులో ధర్మేంద్ర తుదిశ్వాస విడిచారు. కొన్ని వారాల క్రితం శ్వాస సంబంధిత సమస్యలతో ఆసుపత్రిలో చేరిన ఆయనకు వెంటిలేటర్‌పై చికిత్స అందించారు. డిశ్చార్జి అయిన అనంతరం ఇంటి వద్దే చికిత్స పొందుతూ తుదిశ్వాస విడిచారు.