సల్మాన్ ఖాన్ ఇంట డబుల్ సంబరాలు... ఎందుకంటే...!

బాలీవుడ్ కండల వీరుడు సల్మాన్ ఖాన్ కుటుంబంలో వేడుకలు ఘనంగా జరిగాయి. ఒకే రోజు రెండు పెళ్లిళ్ల వార్షికోత్సవాలు రావడంతో ఖాన్ ఫ్యామిలీ అంతా ఒకచోట చేరి సందడి చేసింది. సల్మాన్ తల్లిదండ్రులు సలీం ఖాన్, సల్మా ఖాన్‌లతో పాటు, ఆయన సోదరి అర్పితా ఖాన్ శర్మ, ఆయుష్ శర్మల పెళ్లి రోజు వేడుకలను నవంబర్ 18న కుటుంబ సభ్యులు, సన్నిహితుల మధ్య ఆనందంగా జరుపుకున్నారు.

ఈ వేడుకకు సంబంధించిన ఫొటోలు, వీడియోలను కుటుంబ సభ్యులు తమ సోషల్ మీడియా ఖాతాలలో పంచుకోవడంతో అవి వైరల్‌గా మారాయి. సల్మాన్ సోదరుడు సోహైల్ ఖాన్ కుమారుడు నిర్వాన్ ఖాన్ షేర్ చేసిన ఒక ఫొటోలో ఖాన్ కుటుంబ సభ్యులందరూ ఒకే ఫ్రేమ్‌లో కనిపించారు. సలీం ఖాన్, సల్మా ఖాన్, సల్మాన్, సోహైల్, అర్బాజ్, అర్పిత, ఆయుష్, అల్విరా అగ్నిహోత్రి తదితరులు నవ్వుతూ ఫొటోలకు పోజులిచ్చారు.

ఈ సెలబ్రేషన్స్‌లో రెండు అందమైన కేకులు ప్రత్యేక ఆకర్షణగా నిలిచాయి. ఒక కేక్‌పై సలీం, సల్మాల పేర్ల మొదటి అక్షరాలు 'S S' అని, మరో కేక్‌పై అర్పిత, ఆయుష్‌ల పేర్ల మొదటి అక్షరాలు 'A A' అని ఉన్నాయి. సలీం-సల్మాలది 61వ వార్షికోత్సవం కాగా, అర్పిత-ఆయుష్‌లది 11వ వార్షికోత్సవం అని తెలిపేలా కేకులపై నంబర్లు పెట్టారు.

అర్పితా ఖాన్ షేర్ చేసిన వీడియోలలో, సలీం-సల్మా దంపతులు కేక్ కట్ చేస్తుండగా కుటుంబ సభ్యులు చప్పట్లతో వారిని ఉత్సాహపరిచారు. మరో వీడియోలో ఆయుష్ శర్మ.. హెలెన్‌కు కేక్ తినిపిస్తున్న దృశ్యం కనిపించింది. ఈ ఫొటోలు, వీడియోలు ఖాన్ ఫ్యామిలీ మధ్య ఉన్న బలమైన అనుబంధాన్ని, ప్రేమను తెలియజేస్తున్నాయని అభిమానులు కామెంట్లు పెడుతున్నారు.