యువన్ సంగీతంలో ఇళయరాజా పాట.. తొలిసారి కలిసి పాడిన తండ్రీకొడుకులు

భారత సినీ సంగీత ప్రపంచంలో ఓ అరుదైన ఘట్టం ఆవిష్కృతమైంది. సంగీత దిగ్గజం ఇళయరాజా తన చిన్న కుమారుడు, ప్రముఖ సంగీత దర్శకుడు యువన్ శంకర్ రాజా సంగీతంలో తొలిసారి ఓ పాట పాడారు. వీరిద్దరూ కలిసి ఆలపించిన ఈ ప్రత్యేక గీతం 'కొంబుసీవి' అనే తమిళ చిత్రంలోనిది. తండ్రీకొడుకులు ఇద్దరూ దేశంలోనే అగ్రశ్రేణి సంగీత దర్శకులు కావడంతో ఈ కలయికపై సర్వత్రా ఆసక్తి నెలకొంది.

యువన్ శంకర్ రాజా స్వరపరిచిన ఈ పాట ఎంతో భావోద్వేగంగా సాగుతుందని చిత్రబృందం తెలిపింది. గీత రచయిత పా. విజయ్ రాసిన ఈ పాట "అమ్మా ఎన్ తంగక్కని, నీతానే ఎల్లామ్ ఇని" అంటూ ప్రారంభమవుతుంది. ఇళయరాజా, యువన్ ఇద్దరూ కలిసి ఆలపించిన ఈ గీతం సినిమాకు ప్రధాన ఆకర్షణగా నిలుస్తుందని చెబుతున్నారు. పొన్రామ్ దర్శకత్వం వహిస్తున్న ఈ సినిమాలో సీనియర్ నటుడు శరత్ కుమార్, కెప్టెన్ విజయకాంత్ కుమారుడు షణ్ముగ పాండియన్ ప్రధాన పాత్రల్లో నటిస్తున్నారు.

స్టార్ సినిమాస్ బ్యానర్‌పై ముఖేష్ టి. చెల్లయ్య ఈ చిత్రాన్ని నిర్మిస్తున్నారు. భారీ బడ్జెట్‌తో తెరకెక్కుతున్న ఈ సినిమాలో కామెడీ, యాక్షన్‌కు సమాన ప్రాధాన్యం ఉంటుందని సమాచారం. థేని, ఉసిలంపట్టి ప్రాంతాల నేపథ్య కథతో రూపొందుతున్న ఈ సినిమాలో తర్నిక హీరోయిన్‌గా నటిస్తోంది. మునీష్కాంత్, కాళీ వెంకట్ తదితరులు ఇతర పాత్రల్లో కనిపించనున్నారు. డిసెంబర్‌లో ఈ చిత్రాన్ని విడుదల చేసేందుకు సన్నాహాలు చేస్తున్నారు.