ఐకానిక్ టాటా సియర్రా ఈజ్ బ్యాక్... పెట్రోల్, డీజిల్, ఈవీ వేరియంట్లలో విడుదల!

ఆటోమొబైల్ ప్రియులు ఎంతో ఆసక్తిగా ఎదురుచూస్తున్న టాటా సియర్రా ఎస్‌యూవీని టాటా మోటార్స్ అధికారికంగా ఆవిష్కరించింది. ఈ నెల 25న మార్కెట్లోకి విడుదల కానున్న ఈ కారు, ఒకప్పటి ఐకానిక్ 'సియర్రా' బ్రాండ్‌కు పునరాగమనం పలికింది. 1991లో తొలిసారిగా విడుదలైన సియర్రా, భారతదేశంలో తయారైన మొట్టమొదటి ఆఫ్రోడర్ ఎస్‌యూవీలలో ఒకటిగా గుర్తింపు పొందింది. ఇప్పుడు ఈ ఎస్‌యూవీని పెట్రోల్, డీజిల్, ఎలక్ట్రిక్ వేరియంట్లలో అత్యాధునిక ఫీచర్లతో టాటా మోటార్స్ మళ్లీ తీసుకువస్తోంది.

డిజైన్, ఫీచర్లు
కొత్త టాటా సియర్రా పాత మోడల్ డిజైన్ స్ఫూర్తితో రూపుదిద్దుకుంది. ముఖ్యంగా, పాత సియర్రాలో ప్రత్యేక ఆకర్షణగా నిలిచిన అల్పైన్ విండో రూపాన్ని గుర్తుచేసేలా బ్లాక్డ్-అవుట్ సి-పిల్లర్‌ను అందించారు. ఫ్లాట్ ఫ్రంట్ ప్రొఫైల్, ఇన్ఫినిటీ ఎల్ఈడీ డీఆర్ఎల్, ఫ్లష్ డోర్ హ్యాండిల్స్, స్పోర్టీ అల్లాయ్ వీల్స్ వంటివి దీనికి ఆధునిక రూపాన్ని ఇస్తున్నాయి.

ఇంటీరియర్ విషయానికొస్తే, క్యాబిన్‌లో ప్రీమియం ఫీచర్లు ఉన్నాయి. డాష్‌బోర్డ్‌పై మూడు 12.3-అంగుళాల స్క్రీన్లు (డిజిటల్ ఇన్‌స్ట్రుమెంట్ క్లస్టర్, సెంట్రల్ టచ్‌స్క్రీన్, ప్యాసింజర్ సైడ్ స్క్రీన్) ప్రధాన ఆకర్షణగా నిలవనున్నాయి. వీటితో పాటు పనోరమిక్ సన్‌రూఫ్, వెంటిలేటెడ్ ఫ్రంట్ సీట్లు, వైర్‌లెస్ ఆండ్రాయిడ్ ఆటో, ఆపిల్ కార్‌ప్లే వంటి సదుపాయాలు కూడా ఉన్నాయి.

ఇంజిన్, సేఫ్టీ, ధరలు
ఈ ఎస్‌యూవీ 1.5-లీటర్ టర్బో-పెట్రోల్, 2.0-లీటర్ క్రయోటెక్ డీజిల్ ఇంజిన్ ఆప్షన్లతో లభించనుంది. ఇక సియర్రా ఈవీ, టాటా యాక్ట్ డాట్ ఈవీ  ప్లాట్‌ఫామ్‌పై ఆధారపడి ఉంటుంది. ఇది ఒక్కసారి ఛార్జ్ చేస్తే 450-550 కిలోమీటర్ల రేంజ్ ఇస్తుందని అంచనా. భద్రత విషయంలో ఆరు ఎయిర్‌బ్యాగ్‌లు, లెవల్ 2 ఏడీఏఎస్ టెక్నాలజీ, 360-డిగ్రీ కెమెరా సిస్టమ్ వంటి ఫీచర్లతో వస్తున్న సియర్రా, ఫైవ్-స్టార్ సేఫ్టీ రేటింగ్‌ను లక్ష్యంగా చేసుకుంది.

ధరల విషయానికొస్తే, పెట్రోల్/డీజిల్ వేరియంట్ల ఎక్స్-షోరూమ్ ధర రూ. 17 లక్షల నుంచి రూ. 22 లక్షల మధ్య, ఎలక్ట్రిక్ వేరియంట్ ధర రూ. 20 లక్షల నుంచి రూ. 25 లక్షల మధ్య ఉండొచ్చని మార్కెట్ వర్గాలు అంచనా వేస్తున్నాయి.