ఇమ్మడి రవికి కోట్ల రూపాయల ఆదాయం... అప్పులతో తండ్రి సతమతం!

ప్రముఖ మూవీ పైరసీ వెబ్‌సైట్ 'ఐబొమ్మ' సూత్రధారిగా ఆరోపణలు ఎదుర్కొంటున్న ఇమ్మడి రవి అరెస్ట్ వ్యవహారంపై అతని తండ్రి ఇమ్మడి చిన్న అప్పారావు స్పందించారు. తన కొడుకు చేసిన పనిని తీవ్రంగా ఖండించిన ఆయన, ప్రభుత్వాన్ని సవాల్ చేస్తే పరిణామాలు ఎదుర్కోవాల్సిందేనని వ్యాఖ్యానించారు. కొడుకు కోట్లు సంపాదించాడని వార్తలు వస్తున్నా, తాను మాత్రం విశాఖపట్నంలోని ఓ చిన్న ఇంట్లో సాధారణ జీవితం గడుపుతున్నానని ఆవేదన వ్యక్తం చేశారు.

బీఎస్ఎన్ఎల్ రిటైర్డ్ ఉద్యోగి అయిన చిన్న అప్పారావు మీడియాతో మాట్లాడుతూ.. తన కొడుకు అరెస్ట్ విషయం గ్రామస్థులు, వార్తల ద్వారానే తెలిసిందని చెప్పారు. "మా వాడు ఏదో 'నెట్‌వర్క్' బిజినెస్ చేస్తున్నాడని అనుకున్నాను తప్ప, ఇలాంటి పనుల్లో ఉన్నాడని నాకు తెలియదు," అని ఆయన తెలిపారు. కుటుంబ కలహాల కారణంగా రవి గత రెండేళ్లుగా ఇంటికి రావడం లేదని, అతనితో సంబంధాలు కూడా తెగిపోయాయని పేర్కొన్నారు. రవికి వివాహమై ఒక పాప ఉందని, కానీ ప్రస్తుతం భార్యతో విడిగా ఉంటున్నాడని వివరించారు.

తాను అప్పులు చేసి ఇల్లు కట్టుకున్నానని, ప్రస్తుతం నెలవారీ మందుల ఖర్చులకు కూడా ఇబ్బంది పడుతున్నానని చిన్న అప్పారావు వాపోయారు. తన కొడుకు కోట్లు సంపాదించాడన్న వార్తను నమ్మలేకపోతున్నానని అన్నారు.

"వాడు చేసింది ముమ్మాటికీ తప్పే. ఎంత సంపాదించినా చట్టం ముందు తలవంచాల్సిందే. ప్రభుత్వాన్ని సవాల్ చేస్తే, వాళ్లు సైలెంట్‌గా ఉంటారని ఎలా అనుకుంటారు? పోలీసులు వారి విధి వారు నిర్వర్తిస్తున్నారు. వాడు దొరికాడు, ఇప్పుడు నిబంధనల ప్రకారం వాళ్లు చేయాల్సింది చేస్తారు," అని ఆయన స్పష్టం చేశారు.

ప్రస్తుతం ఇమ్మడి రవి తెలంగాణ పోలీసుల అదుపులో చట్టపరమైన చర్యలను ఎదుర్కొంటుండగా, అతని తండ్రి మాత్రం తన కొడుకు చేసిన తప్పులకు శిక్ష అనుభవించాల్సిందేనని తన నివాసంలో ఉండిపోయారు.