రెండో ఇన్నింగ్స్ లో జడేజా స్పిన్ మ్యాజిక్... కుప్పకూలిన సఫారీ టాపార్డర్

కోల్‌కతాలోని ఈడెన్ గార్డెన్స్ వేదికగా దక్షిణాఫ్రికాతో జరుగుతున్న తొలి టెస్టులో భారత స్టార్ ఆల్‌రౌండర్ రవీంద్ర జడేజా తన స్పిన్ మాయాజాలంతో సత్తా చాటాడు. రెండో ఇన్నింగ్స్‌లో సఫారీ టాపార్డర్‌ను కుప్పకూల్చి మ్యాచ్‌ను భారత్ వైపు తిప్పాడు. రెండో రోజు ఆట ముగిసే సమయానికి దక్షిణాఫ్రికా కేవలం 68 పరుగులకే 5 కీలక వికెట్లు కోల్పోయి పీకల్లోతు కష్టాల్లో పడింది.

రెండో ఇన్నింగ్స్‌లో అద్భుతంగా బౌలింగ్ చేసిన జడేజా 22 పరుగులిచ్చి ఏకంగా 4 వికెట్లు పడగొట్టాడు. మార్‌క్రమ్ (4), ముల్దర్ (11), డి జోర్జి (2), స్టబ్స్ (5) వంటి కీలక బ్యాటర్లను పెవిలియన్ చేర్చాడు. మరో వికెట్‌ను కుల్దీప్ యాదవ్ తన ఖాతాలో వేసుకున్నాడు. దీంతో సఫారీ జట్టు స్వల్ప ఆధిక్యంలో ఉన్నప్పటికీ మ్యాచ్‌పై టీమిండియా పూర్తి ఆధిపత్యం ప్రదర్శించింది.

అంతకుముందు, దక్షిణాఫ్రికా తొలి ఇన్నింగ్స్‌లో 159 పరుగులకు ఆలౌట్ అయింది. బదులుగా భారత్ తమ తొలి ఇన్నింగ్స్‌లో 189 పరుగులు చేసి 30 పరుగుల ఆధిక్యాన్ని సంపాదించింది.

ప్రస్తుతం క్రీజులో కెప్టెన్ బవుమా (24), కైల్ వెరైన్ (3) ఉన్నారు. దక్షిణాఫ్రికా జట్టు 38 పరుగుల ఆధిక్యంలో కొనసాగుతోంది. జడేజా ఇదే ఊపును కొనసాగిస్తే మూడో రోజు సఫారీలను తక్కువ స్కోరుకే కట్టడి చేసి, భారత్ సునాయాసంగా విజయం సాధించే అవకాశాలున్నాయి.