కర్నూలు ట్రిపుల్ ఐటీ విద్యార్థులకు జాక్‌పాట్.. రూ.65 లక్షల ప్యాకేజీతో కొలువులు

ఏపీలోని కర్నూలు ట్రిపుల్ ఐటీ (ఐఐఐటీడీఎం) విద్యార్థులు అద్భుత ప్రతిభ కనబరిచారు. సాధారణ, మధ్యతరగతి కుటుంబాల నుంచి వచ్చిన విద్యార్థులు లక్షల రూపాయల వార్షిక వేతనాలతో ప్రతిష్ఠాత్మక కంపెనీలలో ఉద్యోగాలు సాధించి అందరికీ స్ఫూర్తిగా నిలుస్తున్నారు. ఏకంగా రూ.65 లక్షలు, రూ.53 లక్షల వార్షిక ప్యాకేజీలతో ప్రముఖ కంపెనీల నుంచి ఆఫర్లు అందుకున్నారు. పట్టుదల, కఠోర శ్రమ ఉంటే ఎలాంటి లక్ష్యాన్నైనా చేరుకోవచ్చని వారు నిరూపించారు.

రైతు బిడ్డకు రూ.65 లక్షల జాబ్
ప్రకాశం జిల్లా పెద్దఆరవీడు మండలానికి చెందిన ఏరువ మహేశ్‌ రెడ్డి బెంగళూరుకు చెందిన సూపర్‌మనీ కంపెనీలో రూ.65 లక్షల వార్షిక వేతనంతో ఉద్యోగం సాధించాడు. వ్యవసాయ కుటుంబం నుంచి వచ్చిన మహేశ్, తన చదువు కోసం తల్లిదండ్రులు శివారెడ్డి, రమణమ్మ ఎంతో కష్టపడ్డారని తెలిపాడు. జేఈఈ మెయిన్స్‌లో మంచి ర్యాంకు సాధించి కర్నూలు ట్రిపుల్ ఐటీలో కంప్యూటర్ సైన్స్ విభాగంలో సీటు సంపాదించాడు. కోర్సు సమయంలో సీ, సీ++ వంటి కోడింగ్ లాంగ్వేజీలపై పట్టు సాధించి, పలు ప్రాజెక్టులు చేశానని చెప్పాడు. ఇంటర్వ్యూ సమయంలో ఈ ప్రాజెక్టుల అనుభవంతో పాటు, అదనంగా నేర్చుకున్న నైపుణ్యాలు తనకు ఎంతగానో ఉపయోగపడ్డాయని వివరించాడు.

వైఫల్యం నుంచి విజయానికి..
ఝార్ఖండ్‌కు చెందిన నితీశ్ కుమార్ కథ ఎందరికో స్ఫూర్తిదాయకం. వడ్రంగి పనిచేసే తండ్రి కొడుకైన నితీశ్, మొదటిసారి జేఈఈలో ర్యాంకు సాధించలేకపోయాడు. అయినా నిరాశపడకుండా, ఏడాదిపాటు మళ్లీ కష్టపడి చదివి రెండో ప్రయత్నంలో మంచి ర్యాంకుతో కర్నూలు ట్రిపుల్ ఐటీలో సీటు సంపాదించాడు. కోర్సు సమయంలో అనేక హ్యాకథాన్లు, పోటీల్లో పాల్గొన్నానని, ఆ అనుభవమే ఇంటర్వ్యూలో విజయం సాధించడానికి దోహదపడిందని అన్నాడు. నితీశ్ కూడా సూపర్‌మనీ కంపెనీలోనే రూ.65 లక్షల ప్యాకేజీతో ఉద్యోగం దక్కించుకున్నాడు.

మైక్రోసాఫ్ట్‌లో ఉద్యోగం
ఉత్తర్‌ప్రదేశ్‌కు చెందిన శ్రేయాపాండే టెక్ దిగ్గజం మైక్రోసాఫ్ట్‌లో రూ.53 లక్షల ప్యాకేజీతో ఉద్యోగం సాధించింది. ఈ విజయం వెనుక తన తల్లి శశిపాండే ప్రోత్సాహం ఎంతో ఉందని శ్రేయా పేర్కొంది. జేఈఈ మెయిన్‌లో మంచి ర్యాంకుతో ట్రిపుల్ ఐటీలో కంప్యూటర్ సైన్స్ సీటు సంపాదించింది. చదువుతుండగానే మైక్రోసాఫ్ట్‌లో ఇంటర్న్‌షిప్‌ చేసే అవకాశం లభించిందని, ఆ తర్వాత అదే కంపెనీలో ఉద్యోగం సాధించానని ఆమె వివరించింది. కేవలం సిలబస్‌కే పరిమితం కాకుండా ప్రత్యేక నైపుణ్యాలు పెంచుకోవడం వల్లే ఈ విద్యార్థులు ఇంతటి ఘనవిజయం సాధించి తోటివారికి ఆదర్శంగా నిలుస్తున్నారు.