శార్దూల్ తర్వాత రూథర్‌ఫర్డ్.. దూకుడు మీదున్న ముంబై ఇండియన్స్

ఐపీఎల్ 2026 మినీ వేలానికి ముందే ముంబై ఇండియన్స్ (MI) ట్రేడింగ్ లో దూకుడు ప్రదర్శిస్తోంది. ఇప్పటికే లక్నో సూపర్ జెయింట్స్ (LSG) నుంచి శార్దూల్ ఠాకూర్‌ను దక్కించుకున్న ముంబై, తాజాగా మరో కీలకమైన ట్రేడింగ్ డీల్‌ను పూర్తి చేసింది. గుజరాత్ టైటాన్స్ (GT) నుంచి వెస్టిండీస్ ఆల్‌రౌండర్ షెర్ఫేన్ రూథర్‌ఫర్డ్‌ను జట్టులోకి తీసుకుంది.

గుజరాత్ టైటాన్స్ జట్టు గత సీజన్‌లో రూ. 2.6 కోట్లకు కొనుగోలు చేసిన రూథర్‌ఫర్డ్‌ను, ముంబై ఇండియన్స్ అదే ధరకు ట్రేడింగ్ చేసుకుంది. గత ఏడాది గుజరాత్ తరఫున 13 మ్యాచ్‌లు ఆడిన రూథర్‌ఫర్డ్, కీలక ఇన్నింగ్స్‌లతో మంచి ఫినిషర్‌గా నిరూపించుకున్నాడు. శుభ్‌మన్ గిల్, సాయి సుదర్శన్, జోస్ బట్లర్ తర్వాత జట్టు బ్యాటింగ్‌లో అతడే కీలకంగా వ్యవహరించాడు. ఇంత బాగా ఆడిన ఆటగాడిని గుజరాత్ వదులుకోవడం ఆశ్చర్యం కలిగిస్తోంది. ఇప్పటికే ముంబై జట్టులో నమన్ ధిర్ రూపంలో మంచి ఫినిషర్ ఉండగా, అతడిని మిడిల్ ఆర్డర్‌లో ఉపయోగించుకునేందుకే రూథర్‌ఫర్డ్‌ను తీసుకున్నట్లు తెలుస్తోంది.

ఈ ట్రేడింగ్‌పై ఐపీఎల్ అధికారిక ప్రకటన విడుదల చేసింది. "వెస్టిండీస్ ఆల్‌రౌండర్ షెర్ఫేన్ రూథర్‌ఫర్డ్, ఐపీఎల్ 2026 సీజన్‌లో ముంబై ఇండియన్స్ తరఫున ఆడనున్నాడు. గుజరాత్ టైటాన్స్‌తో విజయవంతమైన ట్రేడింగ్ ద్వారా ఇది సాధ్యమైంది. రూ. 2.6 కోట్ల ప్రస్తుత ఫీజుతోనే అతను ముంబైకి బదిలీ అయ్యాడు" అని పేర్కొంది. 27 ఏళ్ల రూథర్‌ఫర్డ్ వెస్టిండీస్ తరఫున 44 టీ20 మ్యాచ్‌లు ఆడాడు. ఆస్ట్రేలియాతో జరిగిన మ్యాచ్‌లో ఆండ్రీ రస్సెల్‌తో కలిసి ఆరో వికెట్‌కు 139 పరుగుల భాగస్వామ్యం నెలకొల్పి, టీ20లలో రికార్డు సృష్టించాడు.

రూథర్‌ఫర్డ్ ముంబై ఇండియన్స్‌కు తిరిగి రావడం ఇది రెండోసారి. సరిగ్గా ఆరేళ్ల తర్వాత అతను మళ్లీ ఈ ఫ్రాంచైజీ తరఫున బరిలోకి దిగనున్నాడు. గతంలో 2020లో ముంబై జట్టులో ఉన్నప్పటికీ, తుది జట్టులో ఆడే అవకాశం రాలేదు. ఇప్పటివరకు ఐపీఎల్‌లో 23 మ్యాచ్‌లు ఆడిన అతను, 2019లో ఢిల్లీ క్యాపిటల్స్, 2022లో రాయల్ ఛాలెంజర్స్ బెంగళూరుకు ప్రాతినిధ్యం వహించాడు. 2024లో కోల్‌కతా నైట్ రైడర్స్ జట్టులో ఉన్నా ప్లేయింగ్ XIలో చోటు దక్కించుకోలేకపోయాడు.