ఐపీఎల్‌లో భారీ ట్రేడ్ డీల్: చెన్నైకి సంజూ.. రాజస్థాన్‌కు జడేజా?

ఇండియన్ ప్రీమియర్ లీగ్ (ఐపీఎల్) చరిత్రలోనే అత్యంత భారీ ట్రేడ్ డీల్స్‌లో ఒకదానికి రంగం సిద్ధమవుతోంది. చెన్నై సూపర్ కింగ్స్ (సీఎస్‌కే), రాజస్థాన్ రాయల్స్ (ఆర్ఆర్) మధ్య జరగనున్న ఈ మార్పిడిలో వికెట్ కీపర్ బ్యాటర్ సంజూ శాంసన్ చెన్నైకి రానుండగా, స్టార్ ఆల్‌రౌండర్ రవీంద్ర జడేజా రాజస్థాన్‌కు వెళ్లనున్నాడు. అయితే, ఈ డీల్‌లో ఒకే ఒక్క మెలిక ఉండటంతో చర్చలు కొలిక్కి రావడం లేదు. ఈ మేరకు 'ది ఇండియన్ ఎక్స్‌ప్రెస్' ఓ కథనాన్ని ప్రచురించింది.

ఏడేళ్లుగా రాజస్థాన్ రాయల్స్‌తో ఉన్న బంధాన్ని తెంచుకోవాలని సంజూ శాంసన్ నిర్ణయించుకున్నాడు. ఈ విషయాన్ని ఫ్రాంచైజీకి స్పష్టం చేయడంతో, అతడిని ట్రేడ్ చేసేందుకు రాజస్థాన్ సిద్ధమైంది. గత కొన్ని నెలలుగా తెరవెనుక చర్చలు జరుపుతున్న చెన్నై సూపర్ కింగ్స్, సంజూను తమ జట్టులోకి తీసుకునేందుకు ఆసక్తి చూపింది. దీనికి బదులుగా ఇద్దరు ఆటగాళ్లను ఇచ్చేందుకు ముందుకొచ్చింది. వారిలో ఒకరు రవీంద్ర జడేజా కాగా, మరొకరు ఇంగ్లండ్ ఆల్‌రౌండర్ సామ్ కర్రన్.

అయితే రాజస్థాన్ రాయల్స్.. జడేజా విషయంలో సంతృప్తిగా ఉన్నప్పటికీ, సామ్ కర్రన్‌ను తీసుకునేందుకు ఆసక్తి చూపడం లేదు. జడేజాతో పాటు శ్రీలంక యువ పేసర్ మతీశ పతిరనను తమకు ఇవ్వాలని పట్టుబడుతోంది. కానీ, భవిష్యత్ స్టార్‌గా భావిస్తున్న పతిరనను వదులుకునేందుకు చెన్నై యాజమాన్యం ఏమాత్రం సిద్ధంగా లేదు. దీంతో ఈ డీల్ ప్రస్తుతం ముందుకు సాగడం లేదు.

ధోనీతో మాట్లాడాకే జడేజా ఓకే
రాజస్థాన్ రాయల్స్ యాజమాన్యం ఒక భారత స్పిన్నర్‌ను కోరుకోవడంతో ఆరంభం నుంచే జడేజా పేరు చర్చల్లో ఉంది. అయితే, ఈ ట్రేడ్‌కు అంగీకరించే ముందు చెన్నై మాజీ కెప్టెన్ ఎంఎస్ ధోనీ, ప్రస్తుత కెప్టెన్ రుతురాజ్ గైక్వాడ్, కోచ్ స్టీఫెన్ ఫ్లెమింగ్.. జడేజాతో సుదీర్ఘంగా చర్చలు జరిపారు. "ధోనీ స్వయంగా జడేజాతో మాట్లాడి, రాజస్థాన్‌కు వెళ్లే విషయంపై ఆయన ఆసక్తిని తెలుసుకున్న తర్వాతే ఈ డీల్‌పై తదుపరి చర్చలు జరిగాయి" అని ఆ కథనంలో పేర్కొన్నారు. జడేజా అంగీకారం తర్వాత, రాజస్థాన్ శివమ్ దూబేను కూడా అడిగినట్లు, అయితే అందుకు చెన్నై నిరాకరించి పతిరనకు బదులుగా సామ్ కర్రన్‌ను ఆఫర్ చేసినట్లు సమాచారం. ప్రస్తుతం రెండో ఆటగాడి విషయంలో రెండు ఫ్రాంచైజీల మధ్య చర్చలు కొనసాగుతున్నాయి.