ములుగు అడవుల్లో అద్భుతం.. 80 కొత్త రకాల సీతాకోకచిలుకల గుర్తింపు!

తెలంగాణ జీవవైవిధ్యంలో మరో కొత్త అధ్యాయం మొదలైంది. ములుగు జిల్లా అభయారణ్యంలో ఏకంగా 80 రకాల అరుదైన సీతాకోకచిలుక జాతులను గుర్తించినట్లు ఓరుగల్లు వైల్డ్ లైఫ్ సొసైటీ వెల్లడించింది. అటవీ శాఖ పర్యవేక్షణలో చేపట్టిన ప్రత్యేక సర్వేలో ఈ విషయం బయటపడింది.

ఓరుగల్లు వైల్డ్ లైఫ్ సొసైటీ అధ్యక్షుడు ఇందారం నాగేశ్వరరావు ఈ వివరాలను తెలియజేశారు. లక్నవరం, తాడ్వాయి, పస్రా అటవీ ప్రాంతాల్లో మూడు రోజుల పాటు ఈ పరిశోధన నిర్వహించినట్లు ఆయన చెప్పారు. ఈ సర్వేలో దేశంలోని వివిధ రాష్ట్రాల నుంచి 60 మందికి పైగా పరిశోధకులు, వైల్డ్ లైఫ్ ఫొటోగ్రాఫర్లు, పర్యావరణవేత్తలు పాల్గొన్నారని వివరించారు. తెలంగాణలో ఇప్పటివరకు 150కి పైగా సీతాకోకచిలుక జాతులు ఉన్నాయని, తాజాగా గుర్తించిన 80 జాతులతో వాటి సంఖ్య మరింత పెరిగిందని ఆయన పేర్కొన్నారు.

ఈ సందర్భంగా జిల్లా అటవీ శాఖ అధికారి రాహుల్ కిషన్ జాదవ్ మాట్లాడుతూ.. పర్యావరణ సమతుల్యతను కాపాడటంలో సీతాకోకచిలుకలు కీలక పాత్ర పోషిస్తాయని తెలిపారు. ఎన్నో అరుదైన జాతులను గుర్తించి, వాటి మనుగడకు కృషి చేస్తున్న పర్యావరణవేత్తలు, స్వచ్ఛంద సంస్థల సేవలను ఆయన అభినందించారు. ఈ కొత్త ఆవిష్కరణ ములుగు అడవుల జీవవైవిధ్యానికి నిదర్శనమని పర్యావరణ ప్రేమికులు హర్షం వ్యక్తం చేస్తున్నారు.