కళ్ల ముందే కుప్పకూలిన హెలికాప్టర్.. వీడియో ఇదిగో!

రష్యాలో ఆర్మీకి చెందిన హెలికాప్టర్ ఒకటి కూలిపోయింది. యుద్ధ విమానాల విడి భాగాలు తయారు చేసే కంపెనీకి చెందిన సిబ్బందితో ప్రయాణిస్తుండగా ప్రమాదవశాత్తూ ఓ ఇంటిపై కూలింది. దీంతో మంటలు ఎగిసిపడగా.. హెలికాప్టర్ లోని ఏడుగురు ప్రయాణికుల్లో నలుగురు సజీవ దహనమయ్యారు. మిగిలిన ముగ్గురికీ తీవ్ర గాయాలయ్యాయి. సాంకేతిక లోపం కారణంగానే ఈ ప్రమాదం జరిగిందని సమాచారం. ఈ ప్రమాదానికి సంబంధించిన వీడియో ప్రస్తుతం సోషల్ మీడియాలో వైరల్ గా మారింది. 

జిన్హువా వార్తా సంస్థ కథనం ప్రకారం..దక్షిణ రష్యాలోని డాగేస్తాన్ ప్రాంతంలో ఈ ప్రమాదం చోటుచేసుకుందని రష్యా మంత్రి యారోస్లావ్ గ్లాజోవ్ తెలిపారు. ఈ హెలికాప్టర్‌లో రష్యాలోని కిజ్ల్యార్ ఎలక్ట్రోమెకానికల్ ప్లాంట్‌కు చెందిన సీనియర్ సిబ్బంది ఉన్నారని ఆయన వెల్లడించారు. కాగా, సుఖోయ్ మరియు మిగ్ అటాక్ ఎయిర్‌క్రాఫ్ట్ లకు అవసరమైన గ్రౌండ్ కంట్రోల్ మరియు డయాగ్నస్టిక్ సిస్టమ్స్‌ ను కిజ్ల్యార్ ఎలక్ట్రోమెకానికల్ ప్లాంట్ తయారుచేస్తుంది.