22 మిలియన్ డాలర్ల డబ్బు, 26 మంది బిలియనీర్లు కూడా అతడి గెలుపును అడ్డుకోలేకపోయారు!

అమెరికా ఆర్థిక రాజధాని న్యూయార్క్ నగర మేయర్ ఎన్నికల్లో సంచలనం నమోదైంది. దేశంలోని అత్యంత సంపన్నులు, 26 మందికి పైగా బిలియనీర్లు ఏకమై వ్యతిరేకించినప్పటికీ, డెమోక్రాట్ సోషలిస్ట్ అభ్యర్థి జొహ్రాన్ మమ్దానీ ఘన విజయం సాధించారు. ప్రభుత్వ ఆధ్వర్యంలో కిరాణా దుకాణాలు, ఉచిత ప్రజా రవాణా, అందరికీ శిశు సంరక్షణ వంటి ప్రగతిశీల విధానాలతో ఆయన ప్రచారం నిర్వహించారు.

ఫోర్బ్స్ కథనం ప్రకారం, మమ్దానీని ఓడించేందుకు కనీసం 26 మంది బిలియనీర్లు, వారి కుటుంబాలు ఏకమై సుమారు 22 మిలియన్ డాలర్లకు (దాదాపు రూ.183 కోట్లు) పైగా ఖర్చు చేశారు. ఆయన ప్రత్యర్థులకు మద్దతుగా, ఆయనకు వ్యతిరేకంగా ప్రకటనల కోసం ఈ భారీ మొత్తాన్ని వెచ్చించారు. వీరిలో బ్లూమ్‌బెర్గ్ సహ వ్యవస్థాపకుడు మైఖేల్ బ్లూమ్‌బెర్గ్ (8.3 మిలియన్ డాలర్లు), హెడ్జ్ ఫండ్ మేనేజర్ బిల్ ఆక్‌మన్ (1.75 మిలియన్ డాలర్లు), ఎయిర్‌బీఎన్‌బీ సహ వ్యవస్థాపకుడు జో గెబ్బియా, ఎస్టీ లాడర్ వారసులైన లాడర్ కుటుంబ సభ్యులు వంటి ప్రముఖులు ఉన్నారు. వీరిలో 16 మంది బిలియనీర్లు న్యూయార్క్ నగర నివాసితులే కావడం గమనార్హం.

ఈ వ్యతిరేకతపై మమ్దానీ తన ప్రచారంలో స్పందిస్తూ, "బిల్ ఆక్‌మన్, రోనాల్డ్ లాడర్ వంటి బిలియనీర్లు మేమొక పెను ముప్పు అని భావించి ఈ ఎన్నికల్లో మిలియన్ల డాలర్లు కుమ్మరించారు. నేను ఒక విషయం ఒప్పుకుంటున్నాను... వారు చెప్పింది నిజమే" అని అక్టోబర్ 13న జరిగిన ఒక ర్యాలీలో వ్యాఖ్యానించారు.

ఆసక్తికరంగా, ఎన్నికల్లో మమ్దానీని తీవ్రంగా వ్యతిరేకించిన కొందరు వాల్ స్ట్రీట్ ప్రముఖులు ఆయన గెలుపు తర్వాత మద్దతు అందిస్తామని ముందుకు వస్తున్నారు. హెడ్జ్ ఫండ్ మేనేజర్ బిల్ ఆక్‌మన్ 'ఎక్స్'లో మమ్దానీకి అభినందనలు తెలుపుతూ, "ఇప్పుడు మీపై పెద్ద బాధ్యత ఉంది. న్యూయార్క్‌కు నేను ఏమైనా సహాయం చేయగలనంటే చెప్పండి" అని పోస్ట్ చేశారు. గతంలో మమ్దానీని మార్క్సిస్ట్ కన్నా ఎక్కువ అని విమర్శించిన జేపీ మోర్గాన్ చేజ్ సీఈఓ జామీ డైమన్ కూడా ఆయనతో చర్చలకు సిద్ధంగా ఉన్నానని, నగర మేయర్‌కు సహాయం చేస్తానని తెలిపారు.

జొహ్రాన్ మమ్దానీ 2026 జనవరి 1న న్యూయార్క్ నగర మేయర్‌గా బాధ్యతలు స్వీకరించనున్నారు.