ఏపీ ప్రభుత్వంపై మిథాలీ రాజ్ ప్రశంసలు... సీఎం చంద్రబాబు, మంత్రి లోకేశ్ లకు ప్రత్యేక ధన్యవాదాలు

ఆంధ్రప్రదేశ్‌లో మహిళా క్రికెట్ అభివృద్ధికి రాష్ట్ర ప్రభుత్వం అందిస్తున్న ప్రోత్సాహంపై భారత మహిళా క్రికెట్ జట్టు మాజీ కెప్టెన్, లెజెండరీ క్రీడాకారిణి మిథాలీ రాజ్ ప్రశంసలు కురిపించారు. ముఖ్యమంత్రి చంద్రబాబు, మంత్రి నారా లోకేశ్ లకు ఆమె ప్రత్యేకంగా ధన్యవాదాలు తెలిపారు. యువ క్రీడాకారిణి శ్రీ చరణి సాధించిన విజయాన్ని, ఆమె ప్రతిభను గుర్తించినందుకు ప్రభుత్వానికి కృతజ్ఞతలు చెప్పారు.

ముఖ్యమంత్రి చంద్రబాబును ఉద్దేశిస్తూ మిథాలీ రాజ్ తన సందేశాన్ని పంచుకున్నారు. "గౌరవనీయ ముఖ్యమంత్రి చంద్రబాబు గారూ... ఆంధ్రప్రదేశ్‌లో మహిళా క్రికెట్ వృద్ధికి మీరు అందిస్తున్న మద్దతు, ప్రోత్సాహానికి ధన్యవాదాలు. యువ క్రీడాకారిణి శ్రీ చరణి అద్భుతమైన ప్రదర్శనను మీరు అభినందించడం రాష్ట్రంలోని వర్ధమాన అథ్లెట్లందరికీ ఎంతో స్ఫూర్తినిస్తుంది" అని పేర్కొన్నారు.

అదేవిధంగా, మంత్రి నారా లోకేశ్ కు కూడా మిథాలీ రాజ్ కృతజ్ఞతలు తెలిపారు. "నారా లోకేశ్ గారూ.. ఆంధ్రప్రదేశ్‌లో మహిళా క్రికెట్‌కు మీరు అందిస్తున్న నిరంతర ప్రోత్సాహం, మద్దతుకు ధన్యవాదాలు. శ్రీ చరణి సాధించిన విజయం మనందరికీ గర్వకారణం" అని ఆమె వివరించారు.

ఒక దిగ్గజ క్రీడాకారిణి నుంచి ఏపీ ప్రభుత్వానికి ప్రశంసలు లభించడం ప్రాధాన్యత సంతరించుకుంది. రాష్ట్రంలో క్రీడలకు, ముఖ్యంగా మహిళా క్రీడాకారులకు ప్రభుత్వం ఇస్తున్న ప్రాధాన్యతకు మిథాలీ రాజ్ ప్రశంసలు నిదర్శనంగా నిలుస్తున్నాయని క్రీడా వర్గాలు అభిప్రాయపడుతున్నాయి.