కమల్ హాసన్ నిర్మాతగా రజనీకాంత్ 173వ చిత్రం... కోలీవుడ్ లో అల్టిమేట్ ప్రాజెక్ట్

తమిళ చిత్ర పరిశ్రమలో ఓ అద్భుతం ఆవిష్కృతం కానుంది. దశాబ్దాలుగా వెండితెరపై తమ నటనతో ప్రేక్షకుల హృదయాల్లో చెరగని ముద్ర వేసిన ఇద్దరు దిగ్గజాలు కమల్ హాసన్, రజినీకాంత్ ఇప్పుడు కొత్త పాత్రల్లో చేతులు కలపనున్నారు. సూపర్ స్టార్ రజినీకాంత్ కథానాయకుడిగా, లోకనాయకుడు కమల్ హాసన్ నిర్మాతగా ఓ భారీ చిత్రం రాబోతోంది. ఈ చారిత్రక ప్రాజెక్ట్‌ను కమల్ హాసన్ నిర్మాణ సంస్థ 'రాజ్‌కమల్ ఫిలింస్ ఇంటర్నేషనల్' నిర్మించనుంది.

బుధవారం ఈ సంచలన ప్రకటన వెలువడింది. రజినీకాంత్ 173వ చిత్రంగా రానున్న ఈ సినిమాకు (#Thalaivar173) సుందర్ సి దర్శకత్వం వహించనున్నారు. ఇది ఒక మాగ్నమ్ ఓపస్ చిత్రమని కమల్ హాసన్ తెలిపారు. ఈ విషయాన్ని తన ఎక్స్ ఖాతా ద్వారా అధికారికంగా ప్రకటించిన ఆయన, తన స్నేహితుడు రజినీకాంత్‌తో దిగిన ఫొటోను పంచుకున్నారు. తమ స్నేహాన్ని వర్ణిస్తూ ఓ తమిళ కవితను కూడా పోస్ట్ చేశారు.

"భారతీయ సినిమాలోని ఇద్దరు మహోన్నత శక్తులను ఈ ప్రాజెక్ట్ ఏకం చేయడమే కాకుండా, కమల్ హాసన్-రజినీకాంత్ మధ్య ఉన్న ఐదు దశాబ్దాల స్నేహానికి, సోదరభావానికి ఇది నిదర్శనం. వారి బంధం ఎందరో కళాకారులకు స్ఫూర్తినిస్తూనే ఉంది" అని రాజ్‌కమల్ ఫిలింస్ విడుదల చేసిన ప్రకటనలో పేర్కొంది. తమ సంస్థ 44 ఏళ్లు పూర్తి చేసుకున్న సందర్భంగా ఈ భారీ చిత్రాన్ని నిర్మిస్తున్నట్లు తెలిపింది.

రజినీకాంత్ అద్భుతమైన స్క్రీన్ ప్రెజెన్స్, సుందర్ సి దర్శకత్వ ప్రతిభ, కమల్ హాసన్ నిర్మాణ విలువలు ఈ సినిమాను మరో స్థాయికి తీసుకెళతాయని అభిమానులు అంచనా వేస్తున్నారు. ఈ చిత్రాన్ని రెడ్ జెయింట్ మూవీస్ సంస్థ 2027 సంక్రాంతికి ప్రపంచవ్యాప్తంగా థియేటర్లలో విడుదల చేయనుంది. ఇటీవల రజినీకాంత్ సినీ పరిశ్రమలో 50 ఏళ్లు పూర్తి చేసుకున్న సందర్భంగా కమల్ హాసన్ ఆయనకు శుభాకాంక్షలు తెలిపిన విషయం తెలిసిందే. ఇప్పుడు ఏకంగా ఆయనతో సినిమా నిర్మిస్తుండటం కోలీవుడ్‌లో పండగ వాతావరణాన్ని సృష్టించింది.