వరల్డ్ కప్ ట్రోఫీని పచ్చబొట్టు పొడిపించుకున్న కెప్టెన్ హర్మన్ ప్రీత్ కౌర్

భారత మహిళల క్రికెట్ జట్టు కెప్టెన్ హర్మన్‌ప్రీత్ కౌర్ తన చారిత్రక ప్రపంచకప్ విజయాన్ని వినూత్నంగా సెలబ్రేట్ చేసుకున్నారు. ఇటీవలే గెలిచిన 2025 వన్డే ప్రపంచకప్ ట్రోఫీని తన చేతిపై పచ్చబొట్టుగా వేయించుకుని తన ఆనందాన్ని పంచుకున్నారు. ఇది భారత మహిళల జట్టుకు తొలి వన్డే ప్రపంచకప్ కావడం గమనార్హం.

ఈ టాటూలో కేవలం ట్రోఫీ మాత్రమే కాకుండా, గెలిచిన సంవత్సరం '2025', విజయం సాధించిన పరుగుల తేడా '52'ను కూడా చేర్చారు. తన కొత్త టాటూ చిత్రాన్ని ఇన్‌స్టాగ్రామ్‌లో పంచుకుంటూ, 'ఇది నా చర్మంపై, నా హృదయంలో శాశ్వతంగా నిలిచిపోతుంది. తొలిరోజు నుంచి నీకోసం ఎదురుచూశాను. ఇకపై ప్రతి ఉదయం నిన్ను చూస్తూ కృతజ్ఞతతో ఉంటాను' అని భావోద్వేగపూరిత క్యాప్షన్ రాశారు. ఈ విజయంతో, ఐసీసీ టోర్నమెంట్‌లో జట్టును విజయపథంలో నడిపిన తొలి భారత మహిళా కెప్టెన్‌గా హర్మన్‌ప్రీత్ కౌర్ చరిత్ర సృష్టించారు.

ఈ విజయం అనంతరం బీసీసీఐ పంచుకున్న ఒక వీడియోలో ఆమె మాట్లాడుతూ, "ఈ బ్లూ జెర్సీ ఎప్పుడు వేసుకుంటానా అని కలలు కనేదాన్ని. మహిళల క్రికెట్ గురించి తెలియని ఒక చిన్నారిగా, మన దేశంలో మార్పు తీసుకురావాలని ఆశించాను. కలలు కనడం ఎప్పుడూ ఆపకూడదని ఇది నిరూపిస్తుంది. మీ విధి మిమ్మల్ని ఎక్కడికి తీసుకెళుతుందో ఎవరికీ తెలియదు. ఇది జరుగుతుందని నమ్మితే చాలు, అదే జరిగింది" అంటూ తన ఆత్మవిశ్వాసాన్ని, స్ఫూర్తిని పంచుకున్నారు.

మంగళవారం సాయంత్రం భారత్‌కు చేరుకున్న మహిళల జట్టు, బుధవారం ప్రధానమంత్రి నరేంద్ర మోదీతో భేటీ కానుంది. 25 ఏళ్ల తర్వాత ఈ టోర్నమెంట్‌కు కొత్త ఛాంపియన్ లభించడంతో దేశవ్యాప్తంగా సంబరాలు అంబరాన్నంటాయి.