కర్నూలు బీసీ భవనానికి ఎంపీలాడ్స్ నుంచి కోటి మంజూరు: ఆర్ కృష్ణయ్య

కర్నూలు నగరంలో అసంపూర్తిగా ఉన్న బీసీ భవన నిర్మాణానికి తన ఎంపీ లాడ్స్ నిధుల నుంచి కోటి రూపాయలు కేటాయిస్తానని రాజ్యసభ సభ్యుడు, బీసీ సంక్షేమ సంఘం జాతీయ అధ్యక్షుడు ఆర్. కృష్ణయ్య ప్రకటించారు. ఆదివారం ఆయన కర్నూలు నగరంలో విలేకరులతో మాట్లాడారు. పార్లమెంటులో వెంటనే బీసీ బిల్లును ప్రవేశపెట్టి, చట్టసభల్లో బీసీలకు 50 శాతం రిజర్వేషన్లు కల్పించాలని ఆయన డిమాండ్ చేశారు.

బీసీ బిల్లు ఆవశ్యకతను వివరిస్తూ, ఈ అంశంపై త్వరలో ముఖ్యమంత్రి నారా చంద్రబాబు నాయుడిని కలిసి మద్దతు కోరనున్నట్లు కృష్ణయ్య తెలిపారు. పార్లమెంటులో ఈ బిల్లును ప్రవేశపెట్టేలా కేంద్ర ప్రభుత్వంపై ఒత్తిడి తీసుకురావాలని ఆయన ముఖ్యమంత్రిని అభ్యర్థిస్తామన్నారు. ఈ బిల్లును ఆమోదింపజేయడం ప్రధానమంత్రి నరేంద్ర మోదీ వల్లే సాధ్యమవుతుందని ఆయన అభిప్రాయపడ్డారు.

జనాభా గణనలో కులగణన చేపట్టాలన్న తమ విజ్ఞప్తిని గత ప్రభుత్వాలు పట్టించుకోలేదని ఆర్. కృష్ణయ్య విమర్శించారు. అయితే, ప్రస్తుత ఎన్డీయే ప్రభుత్వం ఈ విషయంలో సానుకూలంగా ఉందని ఆయన పేర్కొన్నారు. కేంద్ర ప్రభుత్వం వివిధ వృత్తిదారులకు రాయితీపై రుణాలు అందించి ఆదుకునేందుకు చర్యలు తీసుకుంటోందని ఆయన వివరించారు.

ఈ సమావేశంలో ఎంపీ బస్తిపాటి నాగరాజు, డీసీఎంఎస్‌ ఛైర్మన్‌ వై. నాగేశ్వరరావు యాదవ్‌ తదితరులు పాల్గొన్నారు.