మహిళల ప్రపంచకప్‌లో భారత్ చారిత్రక విజయం.. అభినందించిన సుందర్ పిచాయ్, సత్య నాదెళ్ల

భారత మహిళల క్రికెట్ జట్టు చరిత్ర సృష్టించింది. కోట్లాది మంది అభిమానుల కలలను సాకారం చేస్తూ తొలిసారిగా ఐసీసీ మహిళల వన్డే ప్రపంచకప్‌ను కైవసం చేసుకుంది. ఆదివారం డీవై పాటిల్ స్టేడియంలో జరిగిన ఉత్కంఠభరితమైన ఫైనల్‌లో దక్షిణాఫ్రికాను 52 పరుగుల తేడాతో ఓడించి విశ్వవిజేతగా నిలిచింది. ఈ చారిత్రక విజయంపై ప్రపంచవ్యాప్తంగా ప్రశంసల వర్షం కురుస్తుండగా, టెక్ దిగ్గజాలు గూగుల్ సీఈఓ సుందర్ పిచాయ్, మైక్రోసాఫ్ట్ సీఈఓ సత్య నాదెళ్ల భారత జట్టును ప్రత్యేకంగా అభినందించారు.

ఈ విజయంపై ఎక్స్ (ట్విట్ట‌ర్‌)లో స్పందించిన సుందర్ పిచాయ్.. ఇది 1983, 2011 నాటి పురుషుల ప్రపంచకప్ విజయాలను గుర్తు చేసిందని అన్నారు. "నరాలు తెగే ఉత్కంఠతో సాగిన ఫైనల్ ఇది. టీమిండియాకు అభినందనలు. ఈ విజయం రాబోయే తరానికి ఎంతో స్ఫూర్తినిస్తుందని నేను కచ్చితంగా చెప్పగలను. ఈ టోర్నీలో దక్షిణాఫ్రికా కూడా అద్భుతంగా ఆడింది" అని ఆయన తన పోస్టులో పేర్కొన్నారు.

మైక్రోసాఫ్ట్ సీఈఓ సత్య నాదెళ్ల కూడా భారత జట్టును కొనియాడారు. "ఉమెన్ ఇన్ బ్లూ- ప్రపంచ ఛాంపియన్స్! మహిళల క్రికెట్‌లో ఇది నిజంగా ఒక చారిత్రక రోజు. కొత్త అధ్యాయాలు లిఖించబడ్డాయి. అడ్డంకులు తొలగిపోయాయి, కొత్త లెజెండ్స్ పుట్టుకొచ్చారు" అంటూ ప్రశంసించారు. ప్రపంచంలోని అత్యంత ప్రభావవంతమైన ఇద్దరు టెక్ లీడర్ల నుంచి వచ్చిన ఈ అభినందనలు, ఈ విజయం ప్రాముఖ్యతను తెలియజేస్తోంది.

ఇక, ఈ గెలుపుతో పురుషుల, మహిళల వన్డే ప్రపంచకప్‌లను గెలుచుకున్న మూడో దేశంగా (ఇంగ్లండ్, ఆస్ట్రేలియా తర్వాత) భారత్ నిలిచింది. గ్రూప్ స్టేజీలో వరుసగా మూడు మ్యాచ్‌లలో ఓడిపోయి, సెమీస్‌కు కష్టంగా అర్హత సాధించిన భారత జట్టు, ఆ తర్వాత అద్భుతంగా పుంజుకుని ఆస్ట్రేలియాను, ఫైనల్‌లో దక్షిణాఫ్రికాను ఓడించి కప్ గెలవడం విశేషం. ఈ విజయం దేశవ్యాప్తంగా సంబరాలను నింపడమే కాకుండా, ప్రపంచ క్రికెట్‌లో భారత ఆధిపత్యాన్ని మరోసారి చాటిచెప్పింది.