ఈ దేశంలో ఒక తరం వారికి పొగాకు నిషేధం

పొగాకు వినియోగాన్ని నియంత్రించే దిశగా మాల్దీవులు ప్రభుత్వం ఒక చారిత్రక నిర్ణయం తీసుకుంది. దేశంలో ' ఒక తరానికి నిషేధం' (Generational Ban) విధిస్తూ పొగాకు నియంత్రణ చట్టానికి చేసిన కీలక సవరణలను శనివారం నుంచి అధికారికంగా అమలు చేసింది. దీని ప్రకారం, నిర్దిష్ట సంవత్సరం తర్వాత పుట్టిన వారికి పొగాకు వాడకంపై జీవితకాలం నిషేధం ఉంటుంది.

కొత్త నిబంధనల ప్రకారం, 2007వ సంవత్సరం జనవరి 1వ తేదీ లేదా ఆ తర్వాత జన్మించిన వ్యక్తులు పొగాకు ఉత్పత్తులను వినియోగించడంపై నిషేధం విధించారు. అంతేకాకుండా, 21 ఏళ్లలోపు వయసున్న వారికి లేదా ఈ తరం నిషేధం పరిధిలోకి వచ్చేవారికి పొగాకు ఉత్పత్తులను విక్రయించడం కూడా చట్టవిరుద్ధమని ప్రభుత్వం స్పష్టం చేసింది. ఈ కొత్త చట్టంతో పాటు దేశవ్యాప్తంగా ఎలక్ట్రానిక్ సిగరెట్లు (ఈ-సిగరెట్లు), వేపింగ్ ఉత్పత్తులపై కూడా సంపూర్ణ నిషేధం అమల్లోకి వచ్చింది.

సమర్థులైన, నైతిక విలువలు కలిగిన, శ్రద్ధగల పౌరులను తీర్చిదిద్దాలన్న అధ్యక్షుడు మొహమ్మద్ ముయిజ్జు దార్శనికతకు అనుగుణంగానే ఈ చర్యలు తీసుకున్నట్లు అక్కడి ప్రభుత్వ మీడియా సంస్థ పీఎస్ఎమ్ న్యూస్ వెల్లడించింది. ఈ-సిగరెట్లు, వేపింగ్ పరికరాలు, వాటికి సంబంధించిన ఉపకరణాల వాడకం, దిగుమతి, తయారీ, కలిగి ఉండటాన్ని కూడా ఈ చట్టం నిషేధిస్తోంది.

గత ఏడాది డిసెంబరులోనే వేపింగ్ పరికరాల వాడకం, అమ్మకాలపై మాల్దీవుల ప్రభుత్వం నిషేధం విధించిన విషయం తెలిసిందే. 2024 నవంబర్ 13న అధ్యక్షుడు ముయిజ్జు ఆమోదించిన చట్ట సవరణల మేరకు, 2024 డిసెంబర్ 15 నుంచి వేపింగ్ పరికరాలపై నిషేధం అమలైంది. నిబంధనలు ఉల్లంఘించి ఎవరైనా వేపింగ్ పరికరాలను దిగుమతి చేస్తే వారికి 50,000 మాల్దీవియన్ రుఫియాల (సుమారు 3,250 అమెరికన్ డాలర్లు) జరిమానా విధిస్తారు.

పొగాకు, వేపింగ్‌పైనే కాకుండా మాదకద్రవ్యాల అక్రమ రవాణాను అరికట్టేందుకు కూడా మాల్దీవుల ప్రభుత్వం తన ప్రయత్నాలను ముమ్మరం చేసింది. ఇటీవల పొరుగు దేశమైన శ్రీలంక కూడా అక్రమంగా దిగుమతి చేసుకున్న రూ.1.2 బిలియన్ల విలువైన విదేశీ సిగరెట్లను ధ్వంసం చేయడం ఈ ప్రాంతంలో మాదకద్రవ్యాల నియంత్రణపై ప్రభుత్వాలు చూపుతున్న శ్రద్ధకు నిదర్శనంగా నిలుస్తోంది.