బ్యాటర్ల తడబాటు... రెండో టీ20 మ్యాచ్ లో టీమిండియా ఓటమి

మెల్‌బోర్న్ వేదికగా ఆస్ట్రేలియాతో జరిగిన రెండో టీ20 మ్యాచ్‌లో భారత జట్టు ఓటమిపాలైంది. బ్యాటర్ల వైఫల్యం కారణంగా మొదట స్వల్ప స్కోరుకే పరిమితమైన టీమిండియా, ఆ తర్వాత బౌలింగ్‌లోనూ ప్రభావం చూపలేకపోయింది. ఫలితంగా ఆస్ట్రేలియా 4 వికెట్ల తేడాతో విజయం సాధించింది. 126 పరుగుల లక్ష్య ఛేదనను 13.2 ఓవర్లలో పూర్తి చేసింది.

ఈ మ్యాచ్‌లో టాస్ గెలిచిన ఆస్ట్రేలియా బౌలింగ్ ఎంచుకుంది. బ్యాటింగ్‌కు దిగిన భారత్‌కు ఆరంభంలోనే గట్టి దెబ్బ తగిలింది. టాపార్డర్ బ్యాటర్లు పూర్తిగా చేతులెత్తేశారు. శుభ్‌మన్ గిల్ (5), సంజూ శాంసన్ (2), కెప్టెన్ సూర్యకుమార్ యాదవ్ (1), తిలక్ వర్మ (0) స్వల్ప స్కోర్లకే పెవిలియన్ చేరారు. ఈ దశలో క్రీజులో నిలిచిన అభిషేక్ శర్మ (37 బంతుల్లో 68; 8 ఫోర్లు, 2 సిక్సర్లు) ఆకాశమే హద్దుగా చెలరేగాడు. ఒకవైపు వికెట్లు పడుతున్నా, ఏమాత్రం భయపడకుండా దూకుడుగా ఆడి స్కోరు బోర్డును ముందుకు నడిపించాడు. 

అతనికి చివర్లో హర్షిత్ రాణా (35) నుంచి కొంత సహకారం లభించింది. భారత్ 18.4 ఓవర్లలో 125 పరుగులకు ఆలౌట్ అయింది. ఆసీస్ బౌలర్లలో హేజిల్‌వుడ్ కేవలం 13 పరుగులిచ్చి 3 వికెట్లతో భారత పతనాన్ని శాసించగా, నాథన్ ఎల్లిస్, జేవియర్ బార్ట్ లెట్ చెరో రెండు వికెట్లు పడగొట్టారు.

126 పరుగుల స్వల్ప లక్ష్య ఛేదనలో ఆస్ట్రేలియాకు ఓపెనర్లు అదిరిపోయే ఆరంభాన్నిచ్చారు. కెప్టెన్ మిచెల్ మార్ష్ (26 బంతుల్లో 46), ట్రావిస్ హెడ్ (15 బంతుల్లో 28) తొలి వికెట్‌కు వేగంగా 51 పరుగులు జోడించి విజయాన్ని ఖాయం చేశారు. భారత బౌలర్లు మధ్యలో కొన్ని వికెట్లు తీసి పోటీలోకి వచ్చే ప్రయత్నం చేసినా, అప్పటికే జరగాల్సిన నష్టం జరిగిపోయింది. జస్‌ప్రీత్ బుమ్రా, వరుణ్ చక్రవర్తి చెరో రెండు వికెట్లు తీశారు. చివరికి ఆస్ట్రేలియా 13.2 ఓవర్లలోనే 6 వికెట్లు కోల్పోయి లక్ష్యాన్ని చేరుకుంది.

ఈ విజయంతో ఆస్ట్రేలియా 5 టీ20ల సిరీస్ లో 1-0తో ఆధిక్యంలోకి వెళ్లింది. సిరీస్ లో తొలి మ్యాచ్ వర్షం వల్ల రద్దయిన సంగతి తెలిసిందే. ఇక ఇరుజట్ల మధ్య మూడో మ్యాచ్ నవంబరు 2న హోబర్ట్ లో జరగనుంది.