14,000 కిలోమీటర్ల ప్రయాణం... అణ్వస్త్ర క్షిపణిని విజయవంతంగా పరీక్షించిన రష్యా

పశ్చిమ దేశాలకు స్పష్టమైన హెచ్చరిక జారీ చేస్తూ రష్యా సంచలన చర్యకు పాల్పడింది. అణ్వస్త్ర సామర్థ్యం కలిగిన 'బ్యూరెవెస్ట్నిక్' క్రూయిజ్ క్షిపణిని విజయవంతంగా పరీక్షించినట్లు అధ్యక్షుడు వ్లాదిమిర్ పుతిన్ ప్రకటించారు. ఏ రక్షణ వ్యవస్థ కూడా దీనిని ఛేదించలేదని, త్వరలోనే ఈ క్షిపణిని మోహరించనున్నట్లు ఆయన స్పష్టం చేశారు.

అక్టోబర్ 21న జరిగిన ఈ పరీక్షలో క్షిపణి సుమారు 14,000 కిలోమీటర్లు ప్రయాణించిందని, దాదాపు 15 గంటల పాటు గాలిలో ఉందని రష్యా ఉన్నత సైనికాధికారి జనరల్ వాలెరీ గెరసిమోవ్ వెల్లడించారు. ఉక్రెయిన్ యుద్ధం కొనసాగుతున్న నేపథ్యంలో, పశ్చిమ దేశాల ఒత్తిడికి తాము ఎప్పటికీ తలొగ్గేది లేదనే సంకేతాన్ని ఈ ప్రయోగం ద్వారా రష్యా పంపినట్లు విశ్లేషకులు భావిస్తున్నారు. ముఖ్యంగా అమెరికా అధ్యక్షుడు డొనాల్డ్ ట్రంప్ రష్యా పట్ల కఠిన వైఖరి అవలంబిస్తున్న తరుణంలో ఈ పరీక్ష జరగడం ప్రాధాన్యం సంతరించుకుంది.

బ్యూరెవెస్ట్నిక్ ప్రత్యేకతలు
తొలిసారిగా 2018లో పుతిన్ ఈ క్షిపణిని ప్రపంచానికి పరిచయం చేశారు. నాటో దీనికి 'SSC-X-9 స్కైఫాల్' అని పేరు పెట్టింది. అపరిమితమైన పరిధి, ఊహించని రీతిలో ప్రయాణించే మార్గం కారణంగా ప్రస్తుత, భవిష్యత్ క్షిపణి రక్షణ వ్యవస్థలకు ఇది అజేయమని రష్యా చెబుతోంది.

ఉక్రెయిన్ ఆపరేషన్‌ను పర్యవేక్షిస్తున్న జనరల్స్‌తో జరిగిన సమావేశంలో పుతిన్ మాట్లాడుతూ "ఇది ప్రపంచంలో మరెవరి దగ్గరా లేని ఒక ప్రత్యేకమైన ఆయుధం" అని అన్నారు. గతంలో రష్యా నిపుణులే ఈ ప్రాజెక్టు సాధ్యం కాదని భావించారని, కానీ ఇప్పుడు కీలక పరీక్షలు పూర్తయ్యాయని ఆయన తెలిపారు. ఈ కొత్త ఆయుధాన్ని వర్గీకరించి, దాని మోహరింపునకు అవసరమైన మౌలిక సదుపాయాలను సిద్ధం చేయాలని జనరల్ గెరసిమోవ్‌ను పుతిన్ ఆదేశించారు.