ఏపీఎస్ఆర్‌టీసీలో ఆ అధికారులకు పదోన్నతులు.. ఉత్తర్వులు జారీ చేసిన ప్రభుత్వం

ఆంధ్రప్రదేశ్ రాష్ట్ర రోడ్డు రవాణా సంస్థ (ఏపీఎస్ఆర్టీసీ)లో పలువురు ఉన్నతాధికారులకు పదోన్నతులు లభించాయి. రీజనల్ మేనేజర్ (ఆర్‌ఎం) హోదాలో పనిచేస్తున్న ఆరుగురు అధికారులను ఎగ్జిక్యూటివ్ డైరెక్టర్లు (ఈడీలు)గా ప్రమోట్ చేస్తూ రాష్ట్ర ప్రభుత్వం నిన్న ఉత్తర్వులు జారీ చేసింది. ఇప్పటివరకు వీరంతా ఇన్‌ఛార్జి ఈడీలుగా బాధ్యతలు నిర్వర్తిస్తుండగా, తాజా ఉత్తర్వులతో వారికి పూర్తిస్థాయి ఈడీలుగా పదోన్నతి కల్పించారు. 

పదోన్నతి పొందిన అధికారులలో జి. విజయరత్నం (విజయవాడ జోన్‌), జీవీ రవివర్మ (పరిపాలన), టి. చెంగల్‌రెడ్డి (ఇంజినీరింగ్) ఉన్నారు. వీరితో పాటు పి. చంద్రశేఖర్‌ (కడప జోన్‌), ఎ. అప్పలరాజు (ఆపరేషన్స్‌), జి. నాగేంద్రప్రసాద్‌ (నెల్లూరు జోన్‌)లకు కూడా ఈడీలుగా ప్రమోషన్ కల్పించారు. 

ఇదే క్రమంలో మరో 15 మంది సీనియర్ స్కేల్ కేడర్ అధికారులకు కూడా పదోన్నతులు కల్పించారు. వీరిని స్పెషల్ స్కేల్ సర్వీస్ (ఆర్‌ఎం) కేడర్‌కు ప్రమోట్ చేస్తూ ప్రభుత్వం ఉత్తర్వులిచ్చింది. ఈ పదోన్నతుల ద్వారా ఆర్టీసీలోని కీలక విభాగాల్లో పరిపాలన మరింత పటిష్ఠం కానుందని భావిస్తున్నారు.