శ్రీదేవి 'శివగామి' పాత్రను వదులుకోవడంపై రమ్యకృష్ణ స్పందన

తెలుగు సినిమా చరిత్రలో ‘బాహుబలి’కి, అందులోని శివగామి పాత్రకు ప్రత్యేక స్థానం ఉంది. అయితే ఆ పవర్‌ఫుల్ పాత్రకు తొలుత దివంగత నటి శ్రీదేవిని తీసుకోవాలని అనుకున్నారు. కానీ, చివరికి ఆ పాత్రను రమ్యకృష్ణ చేయడం, శివగామికి ఆమె తప్ప మరెవ్వరూ సెట్ కారు అనేంతగా నటనా ప్రతిభను ప్రదర్శించడం తెలిసిందే. తాజాగా, ఇదే విషయంపై నటి రమ్యకృష్ణ స్పందించారు. నటుడు జగపతి బాబు వ్యాఖ్యాతగా వ్యవహరిస్తున్న ‘జయమ్ము నిశ్చయమ్మురా’ అనే టాక్ షోలో పాల్గొన్న ఆమె, ఈ అంశంపై ఆసక్తికర వ్యాఖ్యలు చేశారు.

ఈ కార్యక్రమంలో రమ్యకృష్ణ మాట్లాడుతూ, శ్రీదేవి తన అభిమాన నటి అని, ఆమె తనకు ఎంతో స్ఫూర్తి అని తెలిపారు. ఈ క్రమంలో జగపతి బాబు జోక్యం చేసుకుంటూ.. "శ్రీదేవి చేయాల్సిన శివగామి పాత్రను మీరు చేయడం ఎలా అనిపించింది?" అని ప్రశ్నించారు. దీనికి రమ్యకృష్ణ సమాధానమిస్తూ, "నిజానికి ఆ విషయం నాకు తెలియదు. ‘బాహుబలి’ చిత్రంలో భాగం కావడం నా అదృష్టం. జీవితంలో కొన్ని అద్భుతాలు జరుగుతాయి. నా విషయంలో ఈ సినిమా అలాంటిదే" అని వినమ్రంగా చెప్పుకొచ్చారు.

ఇదే కార్యక్రమంలో పాల్గొన్న ‘బాహుబలి’ నిర్మాత శోభు యార్లగడ్డ కూడా ఈ విషయంపై స్పందించారు. శివగామి పాత్రలో రమ్యకృష్ణ నటించడం అనేది ఒక డెస్టినీ అని, ఆ పాత్రలో ఆమెను తప్ప మరొకరిని ఊహించుకోలేమని స్పష్టం చేశారు. ఆయన మాటలు రమ్యకృష్ణ నటనకు దక్కిన గౌరవంగా నిలిచాయి.

ప్రభాస్, రానా, అనుష్క, రమ్యకృష్ణ ప్రధాన పాత్రల్లో ఎస్.ఎస్. రాజమౌళి దర్శకత్వంలో వచ్చిన ‘బాహుబలి’ రెండు భాగాలు ప్రపంచవ్యాప్తంగా ఘన విజయం సాధించాయి. ఇప్పుడు ఈ రెండు భాగాలను కలిపి రీ-ఎడిట్ చేసి 'బాహుబలి: ది ఎపిక్' పేరుతో ఒకే సినిమాగా ఈ నెల 31న ప్రేక్షకుల ముందుకు తీసుకురానున్నారు. ఈ నేపథ్యంలోనే చిత్ర యూనిట్ ప్రమోషన్లలో భాగంగా ఈ టాక్ షోలో పాల్గొంది. ‘జీ 5’ ఓటీటీ ప్లాట్‌ఫామ్‌లో ప్రసారమవుతున్న ఈ షోలో నాగార్జున, నాని, కీర్తి సురేశ్ వంటి ప్రముఖులు కూడా గతంలో పాల్గొన్నారు.