చివరి వన్డేలో గెలిచి క్లీన్ స్వీప్ తప్పించుకున్న టీమిండియా

ఆస్ట్రేలియాతో జరిగిన మూడో, ఆఖరి వన్డేలో టీమిండియా 9 వికెట్ల తేడాతో ఘన విజయం సాధించింది. ఇప్పటికే సిరీస్ కోల్పోయినప్పటికీ, ఈ గెలుపుతో క్లీన్‌స్వీప్ గండం నుంచి గట్టెక్కింది. 'హిట్ మ్యాన్' రోహిత్ శర్మ (121*) అజేయ శతకంతో చెలరేగగా, స్టార్ బ్యాటర్ విరాట్ కోహ్లీ (74*) అద్భుత అర్ధశతకంతో రాణించాడు. బౌలింగ్‌లో యువ పేసర్ హర్షిత్ రాణా నాలుగు వికెట్లతో ఆసీస్ పతనాన్ని శాసించాడు.

237 పరుగుల లక్ష్యంతో బరిలోకి దిగిన భారత్‌కు ఓపెనర్లు రోహిత్ శర్మ, కెప్టెన్ శుభ్‌మన్ గిల్ (24) శుభారంభం అందించారు. తొలి వికెట్‌కు 69 పరుగులు జోడించిన తర్వాత గిల్ ఔటయ్యాడు. అనంతరం క్రీజులోకి వచ్చిన విరాట్ కోహ్లీ, రోహిత్‌తో కలిసి మ్యాచ్‌ను ఏకపక్షంగా మార్చేశాడు. ఈ జోడీ రెండో వికెట్‌కు అజేయంగా 168 పరుగుల భాగస్వామ్యం నెలకొల్పి జట్టుకు విజయాన్ని అందించింది. ఈ క్రమంలో రోహిత్ తన వన్డే కెరీర్‌లో 33వ సెంచరీ పూర్తి చేసుకోగా, కోహ్లీ 75వ అర్ధశతకాన్ని నమోదు చేశాడు. అంతేకాకుండా, ఈ ఇన్నింగ్స్‌తో వన్డేల్లో శ్రీలంక దిగ్గజం కుమార సంగక్కరను అధిగమించి అత్యధిక పరుగులు చేసిన రెండో ఆటగాడిగా కోహ్లీ సరికొత్త రికార్డు సృష్టించాడు.

అంతకుముందు, సిడ్నీ క్రికెట్ గ్రౌండ్‌లో టాస్ గెలిచిన ఆస్ట్రేలియా బ్యాటింగ్ ఎంచుకుంది. ఆసీస్ జట్టుకు మంచి ఆరంభం లభించినా, భారత బౌలర్లు క్రమం తప్పకుండా వికెట్లు తీసి కట్టడి చేశారు. ముఖ్యంగా, హర్షిత్ రాణా (4/39) తన అద్భుతమైన బౌలింగ్‌తో ఆతిథ్య జట్టును దెబ్బతీశాడు. అతనికి తోడుగా వాషింగ్టన్ సుందర్ రెండు వికెట్లు పడగొట్టగా, సిరాజ్, అక్షర్ పటేల్, కుల్దీప్ యాదవ్, ప్రసిద్ధ్ కృష్ణ తలో వికెట్ తీశారు. దీంతో ఆస్ట్రేలియా 46.4 ఓవర్లలో 236 పరుగులకు ఆలౌట్ అయింది. ఆసీస్ బ్యాటర్లలో రెన్‌షా (56) ఒక్కడే అర్ధశతకంతో రాణించాడు.

మూడు వన్డేల సిరీస్‌ను ఆస్ట్రేలియా ఇప్పటికే కైవసం చేసుకున్నప్పటికీ, ఆఖరి మ్యాచ్‌లో సాధించిన ఈ ఘన విజయం టీమిండియాకు కొంత ఊరటనిచ్చింది. టీమిండియా ఈ గెలుపు ద్వారా ఆసీస్ ఆధిక్యాన్ని 2-1కి తగ్గించింది.