మూడో వ‌న్డేలో రాణించిన బౌల‌ర్లు.. భారత్‌కు ఓ మోస్తరు లక్ష్యం

సిడ్నీ వేదికగా ఆస్ట్రేలియాతో జరుగుతున్న మూడో వన్డేలో భారత బౌలర్లు అద్భుతంగా రాణించారు. యువ పేసర్ హర్షిత్ రాణా నాలుగు వికెట్లతో సత్తా చాటడంతో ఆస్ట్రేలియా జట్టు 236 పరుగులకే ఆలౌట్ అయింది. సిరీస్‌లో క్లీన్ స్వీప్ నుంచి తప్పించుకోవాలంటే టీమిండియా 237 పరుగులు చేయాల్సి ఉంది. 

టాస్ గెలిచి బ్యాటింగ్ ఎంచుకున్న ఆస్ట్రేలియాకు మంచి ఆరంభమే లభించినా, భారత బౌలర్లు పుంజుకోవడంతో క్రమం తప్పకుండా వికెట్లు కోల్పోయింది. ముఖ్యంగా లోయర్ ఆర్డర్ బ్యాటర్లు పూర్తిగా విఫలం కావడంతో ఆ జట్టు తక్కువ స్కోరుకే పరిమితమైంది. ఆసీస్ బ్యాట‌ర్ల‌లో మాథ్యూ రెన్‌షా అర్ధ శ‌త‌కం (56) రాణించ‌గా...కెప్టెన్ మిచెల్ మార్ష్ 41, మాథ్యూ షార్ట్ 30 ర‌న్స్ చేశారు. భారత బౌలర్లలో హర్షిత్ రాణా నాలుగు వికెట్లతో ఆసీస్ పతనాన్ని శాసించాడు. అలాగే వాషింగ్ట‌న్ సుంద‌ర్ 2 వికెట్లు తీయ‌గా... సిరాజ్‌, ప్ర‌సిద్ధ్ కృష్ణ‌, అక్ష‌ర్, కుల్దీప్ త‌లో వికెట్ ప‌డ‌గొట్టారు.

గంగూలీ రికార్డును అధిగమించిన హిట్ మ్యాన్
ఇదే మ్యాచ్‌లో కెప్టెన్ రోహిత్ శర్మ ఫీల్డర్‌గా ఓ అరుదైన ఘనతను తన ఖాతాలో వేసుకున్నాడు. ఆసీస్ బౌలర్ నాథన్ ఎల్లిస్ క్యాచ్ అందుకోవడం ద్వారా వన్డే ఫార్మాట్‌లో 100 క్యాచ్‌లు పూర్తి చేసుకున్నాడు. ఈ క్రమంలో టీమిండియా మాజీ కెప్టెన్ సౌరవ్ గంగూలీ (99 క్యాచ్‌లు) రికార్డును రోహిత్ అధిగమించాడు.

భారత్ తరఫున వన్డేల్లో 100కి పైగా క్యాచ్‌లు పట్టిన ఆరో ఫీల్డర్‌గా రోహిత్ నిలిచాడు. ఈ జాబితాలో విరాట్ కోహ్లీ (163), మహ్మద్ అజారుద్దీన్ (156), సచిన్ టెండూల్కర్ (140), రాహుల్ ద్రవిడ్ (124), సురేశ్ రైనా (102) రోహిత్ కంటే ముందున్నారు. ప్రస్తుతం భారత్ ముందున్న సులభ లక్ష్యాన్ని ఛేదించి, ఆఖరి మ్యాచ్‌లోనైనా గెలిచి పరువు నిలుపుకోవాలని అభిమానులు ఆశిస్తున్నారు.