ఓటీటీలోకి వచ్చేసిన 46 అవార్డుల సినిమా

విజయ రామరాజు ప్రధాన పాత్రలో నటించిన స్పోర్ట్స్ డ్రామా ‘అర్జున్ చక్రవర్తి’ థియేటర్లలో విజయం సాధించిన తర్వాత ఇప్పుడు ఓటీటీ ప్రేక్షకులను పలకరించేందుకు సిద్ధమైంది. ఈ చిత్రం నేటి నుంచి ప్రముఖ ఓటీటీ వేదిక అమెజాన్ ప్రైమ్ వీడియోలో స్ట్రీమింగ్ అవుతోంది. ఈ విషయాన్ని చిత్రబృందం ట్విట్టర్ ద్వారా ఒక ప్రత్యేక పోస్టర్‌ను విడుదల చేసి అధికారికంగా ప్రకటించింది.

విక్రాంత్ రుద్ర దర్శకత్వం వహించిన ఈ చిత్రాన్ని శ్రీని గుబ్బల నిర్మించారు. కబడ్డీ నేపథ్యంలో తెరకెక్కిన ఈ సినిమా, ఆగస్టు 29న థియేటర్లలో విడుదలై ప్రేక్షకులు, విమర్శకుల నుంచి మంచి ప్రశంసలు అందుకుంది. భావోద్వేగాలు, ప్రేమకథ వంటి అంశాలను జోడించి రూపొందించడంతో అన్ని వర్గాల ప్రేక్షకులను ఆకట్టుకుంది. ముఖ్యంగా, ఈ చిత్రం అంతర్జాతీయ స్థాయిలో గుర్తింపు పొంది, ఏకంగా 46 ఫిలిం అవార్డులను కైవసం చేసుకోవడం విశేషం.

థియేటర్లలో మంచి విజయాన్ని నమోదు చేసుకున్న ఈ సినిమా ఇప్పుడు డిజిటల్ మాధ్యమంలోకి అడుగుపెట్టడంతో, థియేటర్లలో చూడలేకపోయిన సినీ ప్రియులు ఇంట్లోనే చూసే అవకాశం లభించింది. కుటుంబంతో కలిసి ఈ వారాంతంలో చూడటానికి ‘అర్జున్ చక్రవర్తి’ ఒక మంచి ఆప్షన్‌గా నిలుస్తుందని పలువురు అభిప్రాయపడుతున్నారు.