హైదరాబాద్ ఉప్పల్ లో పట్టపగలే చైన్ స్నాచింగ్... వీడియో ఇదిగో!

హైదరాబాద్ ఉప్పల్ పోలీస్ స్టేషన్ పరిధిలో చైన్ స్నాచింగ్ కలకలం రేగింది. సెవెన్ హిల్స్ కాలనీలో పట్టపగలే ఓ మహిళ మెడలోంచి గొలుసు లాక్కెళ్లేందుకు ప్రయత్నించిన దొంగను స్థానికులు పట్టుకుని దేహశుద్ధి చేశారు. 

వివరాల్లోకి వెళితే, సెవెన్ హిల్స్ కాలనీలో ఓ మహిళ రోడ్డుపై నడుచుకుంటూ వెళుతున్నారు. అదే సమయంలో ఆమెను వెంబడించిన ఓ దుండగుడు, అదును చూసి ఆమె మెడలోని నాలుగు తులాల బంగారు గొలుసును లాక్కొని పారిపోయేందుకు ప్రయత్నించాడు. ఒక్కసారిగా జరిగిన ఈ ఘటనతో తేరుకున్న మహిళ గట్టిగా కేకలు వేసింది.

ఆమె అరుపులు విన్న వెంటనే అప్రమత్తమైన స్థానికులు, చుట్టుపక్కల వారు వెంటనే స్పందించారు. పారిపోతున్న దొంగను వెంబడించి, కొంత దూరంలోనే అతడిని పట్టుకున్నారు. అనంతరం ఆగ్రహంతో దొంగకు దేహశుద్ధి చేశారు. ఈ మొత్తం ఘటన సమీపంలోని ఓ సీసీటీవీ కెమెరాలో రికార్డయింది. పట్టపగలే ఇలాంటి ఘటనలు జరగడంతో స్థానికులు ఆందోళన వ్యక్తం చేస్తున్నారు.