బీజేపీ ఏ ఒక్క మతానికో పరిమితం కాదు: మాధవ్

బీజేపీని కేవలం ఒక మతానికి చెందిన పార్టీగా చూడటం సరికాదని ఆ పార్టీ ఏపీ రాష్ట్ర అధ్యక్షుడు మాధవ్ స్పష్టం చేశారు. తిరుపతిలో ఆయన మీడియా సమావేశంలో మాట్లాడుతూ.. బీజేపీపై కొందరు చేస్తున్న ప్రచారాన్ని ఖండించారు. "సర్వధర్మ సమభావన, హైందవ ధర్మం నిత్యనూతనం అనేవే మా నినాదాలు" అని ఆయన తేల్చిచెప్పారు.

సమాజంలో కొన్ని వర్గాలు వివక్షకు గురవుతున్నాయని, అలాంటి వారి ఆత్మగౌరవాన్ని పెంచడమే తమ లక్ష్యమని మాధవ్ తెలిపారు. ముఖ్యంగా క్షురక వృత్తిలో ఉన్న నాయిబ్రాహ్మణులను చిన్నచూపు చూస్తున్నారని, వారు బలహీనులు కాదని, బలవంతులని సమాజానికి తెలియజేయాల్సిన అవసరం ఉందని ఆయన అభిప్రాయపడ్డారు. నాయిబ్రాహ్మణులకు నాదస్వరం వాయించడంతో పాటు ధన్వంతరి ఆయుర్వేదంలో కూడా ప్రావీణ్యం ఉందని ఆయన గుర్తుచేశారు.

ఈ నేపథ్యంలోనే నాయిబ్రాహ్మణుల అభ్యున్నతి కోసం బీజేపీ ఆధ్వర్యంలో రాష్ట్రవ్యాప్తంగా 'సంజీవిని', 'స్వరం' అనే ప్రత్యేక కార్యక్రమాలను నిర్వహిస్తున్నట్లు మాధవ్ ప్రకటించారు. లోక కల్యాణం కోసం, అన్ని వర్గాల ప్రజల క్షేమం కోసం దేశవ్యాప్తంగా యాగాలు కూడా నిర్వహిస్తామని ఆయన వెల్లడించారు. సమాజంలోని ప్రతి ఒక్కరి గౌరవాన్ని కాపాడటమే తమ పార్టీ ఉద్దేశమని ఆయన పేర్కొన్నారు.