'కె-ర్యాంప్' అమెరికా ప్రీమియర్స్... అడ్వాన్స్ బుకింగ్స్ లో జోరు

యువ కథానాయకుడు కిరణ్ అబ్బవరం నటించిన తాజా చిత్రం ''కె-ర్యాంప్' విడుదలకు ముందే ఓవర్సీస్‌లో మంచి బజ్ సంపాదించుకుంటోంది. ముఖ్యంగా అమెరికాలో ఈ సినిమా ప్రీమియర్ల అడ్వాన్స్ బుకింగ్స్ ఆశాజనకంగా ఉన్నాయి. ఇప్పటివరకు అందిన సమాచారం ప్రకారం, యూఎస్‌లో ప్రీమియర్ల ద్వారా ఈ చిత్రం 34,951 డాలర్లు (భారత కరెన్సీలో సుమారు రూ. 29 లక్షలు) వసూలు చేసింది.

వివరాల్లోకి వెళితే, అమెరికా వ్యాప్తంగా మొత్తం 216 లొకేషన్లలో 355 ప్రీమియర్ షోలకు గాను 2,368 టికెట్లు అమ్ముడయ్యాయి. దీపావళి పండుగ సందర్భంగా అక్టోబర్ 18న ప్రపంచవ్యాప్తంగా థియేటర్లలోకి రానున్న ఈ సినిమాకు, ఒక రోజు ముందే యూఎస్‌లో ఇలాంటి ఆరంభం లభించడం చిత్ర బృందంలో ఉత్సాహాన్ని నింపుతోంది.

జైన్స్ నాని దర్శకత్వం వహించిన ఈ యాక్షన్ ఎంటర్‌టైనర్‌లో కిరణ్ అబ్బవరం సరసన యుక్తి తరేజా హీరోయిన్‌గా నటించారు. హాస్య మూవీస్, రుద్రాంశ్ సెల్యులాయిడ్ పతాకాలపై రాజేష్ దండ, శివ బొమ్మక్ 'కె-ర్యాంప్' చిత్రాన్ని నిర్మించారు. చైతన్ భరద్వాజ్ ఈ సినిమాకు సంగీతాన్ని అందించారు. రేపు విడుదల కానున్న ఈ సినిమాపై ప్రేక్షకుల్లో మంచి అంచనాలే ఉన్నాయి.