దీపావళి ముందు మార్కెట్ల ధూమ్ ధామ్.. 52 వారాల గరిష్ఠానికి సూచీలు!

పండగ సీజన్‌కు స్వాగతం పలుకుతూ దేశీయ స్టాక్ మార్కెట్లు సరికొత్త శిఖరాలను అధిరోహించాయి. వరుసగా మూడో రోజు శుక్రవారం కూడా సూచీలు లాభాల బాటలో పయనించి, 52 వారాల గరిష్ఠ స్థాయిలను నమోదు చేశాయి. ఫైనాన్షియల్, ఆటో, ఎఫ్‌ఎం‌సి‌జి రంగాల షేర్లలో వెల్లువెత్తిన కొనుగోళ్ల మద్దతుతో మార్కెట్లు పరుగులు పెట్టాయి.

ట్రేడింగ్ ముగిసే సమయానికి, బీఎస్ఈ సెన్సెక్స్ 484.53 పాయింట్లు లాభపడి 83,952.19 వద్ద స్థిరపడింది. అదేవిధంగా, ఎన్ఎస్ఈ నిఫ్టీ 124.55 పాయింట్లు పెరిగి 25,709.85 వద్ద ముగిసింది. ఎఫ్‌ఎం‌సీజీ రంగం 1.37 శాతం వృద్ధితో టాప్ పెర్ఫార్మర్‌గా నిలవగా... ఆటో, బ్యాంకింగ్, ఫార్మా, రియల్టీ రంగాలు కూడా లాభాలను ఆర్జించాయి. అయితే ఐటీ, మీడియా షేర్లు మాత్రం నష్టాలను చవిచూశాయి. సెన్సెక్స్‌లో ఏషియన్ పెయింట్స్, మహీంద్రా & మహీంద్రా, భారతీ ఎయిర్‌టెల్, ఐటీసీ, హిందుస్థాన్ యూనిలీవర్, ఐసీఐసీఐ బ్యాంక్ వంటివి ప్రధానంగా లాభపడ్డాయి.

పెద్ద కంపెనీల షేర్లలో కొనుగోళ్ల జోరు కనిపించినప్పటికీ, బ్రాడర్ మార్కెట్‌లో మిశ్రమ స్పందన వ్యక్తమైంది. నిఫ్టీ మిడ్‌క్యాప్ 100 ఇండెక్స్ 0.57 శాతం క్షీణించగా, స్మాల్‌క్యాప్ 100 సూచీ 0.05 శాతం స్వల్పంగా నష్టపోయింది. సాంకేతికంగా నిఫ్టీ మరింత బలపడే అవకాశం ఉందని, "ధర తగ్గినప్పుడు కొనుగోలు చేసే వ్యూహం" మంచి ఫలితాలనిస్తుందని నిపుణులు అభిప్రాయపడుతున్నారు.

మరోవైపు, పసిడి కూడా తన పరుగును కొనసాగించింది. అమెరికాలో ప్రభుత్వ షట్‌డౌన్, డాలర్ ఇండెక్స్ బలహీనపడటంతో సురక్షిత పెట్టుబడిగా బంగారానికి డిమాండ్ పెరిగింది. ఫలితంగా, బంగారం ధర రూ. 1,700 (1.30 శాతం) పెరిగి రూ. 1,31,500కు చేరింది.