అమెరికా గ్రీన్ కార్డు లాటరీ.. 2028 వరకు భారతీయులకు నో ఛాన్స్!

అమెరికాలో శాశ్వత నివాసం ఏర్పాటు చేసుకోవాలని ఆశించే వేలాది మంది భారతీయులకు నిరాశే ఎదురైంది. ప్రతిష్ఠాత్మక డైవర్సిటీ వీసా (డీవీ) లాటరీ కార్యక్రమం నుంచి అమెరికా మరోసారి భారత్‌ను మినహాయించింది. అమెరికాకు వలస వెళ్తున్న భారతీయుల సంఖ్య భారీగా ఉండటంతో ఈ నిర్ణయం తీసుకున్నట్లు తెలుస్తోంది. ఈ నిబంధన కనీసం 2028 వరకు కొనసాగనుంది.

ఎందుకీ మినహాయింపు?
అమెరికా వలస జనాభాలో వైవిధ్యాన్ని ప్రోత్సహించేందుకు డీవీ లాటరీని నిర్వహిస్తారు. గత ఐదేళ్లలో ఏ దేశం నుంచైనా 50,000 కంటే తక్కువ మంది అమెరికాకు వలస వచ్చి ఉంటే, ఆ దేశ పౌరులు మాత్రమే ఈ లాటరీకి అర్హులు. అయితే, భారత్ నుంచి అమెరికాకు వెళ్తున్న వారి సంఖ్య ఈ పరిమితిని ఎప్పుడో దాటిపోయింది. దీంతో భారతీయులు ఆటోమేటిక్‌గా ఈ లాటరీకి అనర్హులుగా మారారు.

అమెరికా ప్రభుత్వ గణాంకాల ప్రకారం, 2021లో 93,450 మంది, 2022లో 1,27,010 మంది, 2023లో 78,070 మంది భారతీయులు అమెరికాకు వలస వెళ్లారు. ముఖ్యంగా 2022లో దక్షిణ అమెరికా, ఆఫ్రికా, ఐరోపా ఖండాల నుంచి వచ్చిన మొత్తం వలసదారుల కంటే భారతీయుల సంఖ్యే ఎక్కువగా ఉండటం గమనార్హం. ఈ అధిక సంఖ్య కారణంగానే 2028 వరకు డీవీ లాటరీ జాబితాలో భారత్‌కు చోటు దక్కలేదు.

తగ్గుతున్న మార్గాలు
భారత్‌తో పాటు చైనా, దక్షిణ కొరియా, కెనడా, పాకిస్థాన్ వంటి దేశాలు కూడా 2026 డీవీ లాటరీకి అనర్హుల జాబితాలో ఉన్నాయి. ఈ లాటరీ మార్గం మూసుకుపోవడంతో హెచ్-1బీ వీసాను శాశ్వత నివాసంగా మార్చుకోవడం, పెట్టుబడుల ఆధారిత వలస, కుటుంబ స్పాన్సర్‌షిప్ లేదా ఆశ్రయం వంటి పరిమిత మార్గాలు మాత్రమే భారతీయులకు అందుబాటులో ఉన్నాయి.

అయితే, డొనాల్డ్ ట్రంప్ ప్రభుత్వం అనుసరిస్తున్న కఠిన వలస విధానాల వల్ల ఈ మార్గాలు కూడా సంక్లిష్టంగా మారుతున్నాయి. ముఖ్యంగా విద్యార్థి వీసాలపై నిఘా, సోషల్ మీడియా పరిశీలన, దరఖాస్తుదారుల నేపథ్యంపై కఠినమైన స్క్రీనింగ్ వంటి చర్యలతో వలస ప్రక్రియ మరింత కష్టతరంగా మారింది. ఇది దరఖాస్తుదారులతో పాటు వారిని నియమించుకునే సంస్థలలోనూ ఆందోళన కలిగిస్తోంది.