తెలుసు కదా' ట్రైలర్: ప్రేమలో పవర్‌ నాదే అంటున్న సిద్ధు జొన్నలగడ్డ

యంగ్ హీరో సిద్ధు జొన్నలగడ్డ, శ్రీనిధి శెట్టి, రాశీ ఖన్నా ప్రధాన పాత్రల్లో నటిస్తున్న చిత్రం 'తెలుసు కదా'. ప్రముఖ దర్శకురాలు నీరజ కోన తెరకెక్కిస్తున్న ఈ రొమాంటిక్ డ్రామాపై ప్రేక్షకుల్లో మంచి అంచనాలు ఉన్నాయి. తాజాగా సోమవారం చిత్రబృందం ఈ సినిమా ట్రైలర్‌ను విడుదల చేయగా, అది సోషల్ మీడియాలో విశేషంగా ఆకట్టుకుంటోంది. ముఖ్యంగా సిద్ధు చెప్పిన పవర్‌ఫుల్ డైలాగ్స్ చర్చనీయాంశంగా మారాయి.

ట్రైలర్ ఆరంభంలోనే ప్రేమ, సంబంధాల్లో అధికారం ఎవరి చేతుల్లో ఉండాలనే విషయంపై సిద్ధు తన అభిప్రాయాన్ని బలంగా వ్యక్తం చేశాడు. "ఓ ఆడపిల్ల ముందు మన బాధను, కన్నీళ్లను చూపిస్తే.. మన కంట్రోల్ మొత్తం వాళ్ల చేతుల్లోకి వెళ్లిపోతుంది. పవర్ సెంటర్ ఎప్పుడూ ఇక్కడే (గుండెను చూపిస్తూ) ఉండాలి. ఎవర్ని ప్రేమించాలి, ఎంత ప్రేమించాలి, ఎలా ప్రేమించాలనేది మన కంట్రోల్‌లో ఉండాలి" అంటూ సిద్ధు చెప్పిన సంభాషణలు సినిమా కథనంపై ఆసక్తిని రేకెత్తిస్తున్నాయి.

ఈ చిత్రంలో సిద్ధు పాత్ర చాలా భిన్నంగా ఉండబోతున్నట్లు ట్రైలర్ స్పష్టం చేస్తోంది. ఒక సందర్భంలో "నిన్ను చూస్తే భయంగా ఉంది" అని శ్రీనిధి శెట్టి పాత్ర అనగా, "అయితే భయపడు" అని సిద్ధు నిర్లక్ష్యంగా సమాధానమిస్తాడు. మరో సన్నివేశంలో, "నిన్ను పెళ్లి చేసుకుంటే మంచి జీవితానికి గ్యారెంటీ ఇస్తావా?" అని రాశీ ఖన్నా ప్రశ్నించగా, "గ్యారెంటీలు, వారెంటీలు ఇవ్వడానికి నేనేం సేల్స్‌మ్యాన్‌ను కాదు" అంటూ ఆయన బదులివ్వడం చూడొచ్చు.

పీపుల్ మీడియా ఫ్యాక్టరీ నిర్మిస్తున్న ఈ చిత్రాన్ని దీపావళి పండుగ సందర్భంగా అక్టోబర్ 17న థియేటర్లలో విడుదల చేయనున్నట్లు నిర్మాతలు ప్రకటించారు. ట్రైలర్‌ను బట్టి చూస్తే ఇద్దరు అమ్మాయిలతో ఒకేసారి సంబంధం కొనసాగించే ఓ ఆధిపత్య స్వభావం గల యువకుడి కథగా ఈ సినిమా ఉండబోతోందని తెలుస్తోంది. ప్రేమ కంటే అధికారం, నియంత్రణ అనే అంశాల చుట్టూ ఈ కథ తిరిగే అవకాశం కనిపిస్తోంది.