నెట్ ఫ్లిక్స్ నుంచి కొత్త సరుకు

ప్రముఖ ఓటీటీ వేదిక నెట్‌ఫ్లిక్స్, తెలుగు, తమిళ ప్రేక్షకులను ఆకట్టుకునేందుకు సిద్ధమైంది. పండగ సీజన్‌ను పురస్కరించుకుని మొత్తం ఆరు కొత్త ఒరిజినల్ సినిమాలు, వెబ్ సిరీస్‌లను తీసుకురానున్నట్లు సోమవారం ఒక ప్రకటనలో వెల్లడించింది. ఇందులో యంగ్ హీరోలు సందీప్ కిషన్, ఆనంద్ దేవరకొండ నటిస్తున్న రెండు ఆసక్తికరమైన తెలుగు ప్రాజెక్టులు కూడా ఉండటం విశేషం.

తెలుగులో సందీప్ కిషన్ ప్రధాన పాత్రలో 'సూపర్ సుబ్బు' అనే కామెడీ సిరీస్‌ను రూపొందిస్తున్నారు. మారుమూల గ్రామంలోని ప్రజలకు సెక్స్ ఎడ్యుకేషన్‌పై అవగాహన కల్పించాల్సి వచ్చిన ఓ యువకుడి కథ ఇది. ఈ పనికి ఏమాత్రం అర్హత లేని అతను ఎలాంటి ఇబ్బందులు పడ్డాడనేది హాస్యభరితంగా చూపిస్తారని నెట్‌ఫ్లిక్స్ తెలిపింది. ఈ సిరీస్‌కు మల్లిక్ రామ్ దర్శకత్వం వహిస్తున్నారు. 

ఇక ఆనంద్ దేవరకొండ హీరోగా 'తక్షకుడు' అనే జానపద థ్రిల్లర్‌ను తీసుకురానున్నారు. తన గ్రామస్థుల మరణానికి ప్రతీకారం తీర్చుకోవాలని నిర్ణయించుకున్న ఓ అంధుడి కథగా దీన్ని తెరకెక్కిస్తున్నారు. ఈ ప్రయాణంలో అతనికి తన పెంపుడు కుక్క తోడుగా ఉంటుంది. వినోద్ అనంతోజు ఈ చిత్రానికి దర్శకుడు.

ఈ రెండు తెలుగు ప్రాజెక్టులతో పాటు నాలుగు తమిళ ఒరిజినల్స్‌ను కూడా నెట్‌ఫ్లిక్స్ ప్రకటించింది. ఇందులో మాధవన్, గౌతమ్ కార్తీక్, గుల్షన్ దేవయ్య వంటి భారీ తారాగణంతో 'లెగసీ' అనే గ్యాంగ్‌స్టర్ డ్రామా సిరీస్ రానుంది. అలాగే అర్జున్ దాస్, ఐశ్వర్య లక్ష్మి జంటగా 'లవ్' అనే రొమాంటిక్ డ్రామా, ప్రియాంక మోహన్, 'స్క్విడ్ గేమ్' ఫేమ్ పార్క్ హే-జిన్ నటించిన 'మేడ్ ఇన్ కొరియా' అనే క్రాస్-కల్చరల్ సినిమా, గోమతి శంకర్ కీలక పాత్రలో 'స్టీఫెన్' అనే సైకలాజికల్ థ్రిల్లర్‌ను కూడా స్ట్రీమింగ్ చేయనున్నట్లు వెల్లడించింది.

ఈ సందర్భంగా నెట్‌ఫ్లిక్స్ ఇండియా కంటెంట్ వైస్ ప్రెసిడెంట్ మోనికా షెర్గిల్ మాట్లాడుతూ, "దక్షిణాది భాషలు, సంస్కృతులకు చెందిన కథలను ప్రోత్సహించడానికి మేం కట్టుబడి ఉన్నాం. ఈ ప్రాంతంలోని కథా సంపద మా ఎదుగుదలలో కీలక పాత్ర పోషించింది. ఇప్పుడు తెలుగు, తమిళ సినిమా రంగాల్లోని కొత్తతరం ప్రతిభావంతులతో కలిసి థ్రిల్లర్లు, కామెడీలు, డ్రామాలు అందిస్తున్నందుకు సంతోషంగా ఉంది" అని వివరించారు.