పాండ్యా కొత్త లవ్ స్టోరీ.. కుటుంబంతో కలిసి ప్రియురాలితో బర్త్ డే వేడుక.. ఫొటోలు వైరల్!

టీమిండియా స్టార్ ఆల్ రౌండర్ హార్దిక్ పాండ్యా తన వ్యక్తిగత జీవితానికి సంబంధించి వస్తున్న ఊహాగానాలకు తెరదించారు. తన కొత్త ప్రియురాలు, మోడల్ మహియికా శర్మతో కలిసి దిగిన ఫొటోలను సోషల్ మీడియాలో పంచుకుని తన బంధాన్ని పరోక్షంగా అధికారికం చేశారు. ఇటీవల ఆసియా కప్ 2025 విజయంలో కీలక పాత్ర పోషించిన పాండ్యా, ఈ నెల‌ 11న తన 32వ పుట్టినరోజును మాల్దీవుల్లోని ఓ అందమైన బీచ్‌లో ఘనంగా జరుపుకున్నారు.

ఈ వేడుకకు సంబంధించిన ఫొటోలను హార్దిక్ తన ఇన్‌స్టాగ్రామ్ ఖాతాలో పోస్ట్ చేయగా, అవి క్షణాల్లో వైరల్ అయ్యాయి. ఈ ఫొటోల్లో పాండ్యా, మహియికా ఎంతో అన్యోన్యంగా కనిపించారు. బీచ్‌లో చేతిలో చేయి వేసుకుని నడుస్తున్న వీడియోతో పాటు ఇద్దరూ కలిసి దిగిన రొమాంటిక్ ఫొటోలు అభిమానులను ఆకట్టుకుంటున్నాయి. చాక్లెట్ కేక్, ఇతర సర్ప్రైజ్‌లతో ఈ వేడుకను చాలా ప్రైవేట్‌గా, కొద్దిమంది సమక్షంలో జరుపుకున్నట్లు తెలుస్తోంది.

ఈ వేడుకల్లో హార్దిక్ పాండ్యా కుమారుడు అగస్త్య, తల్లి, నానమ్మ కూడా పాల్గొనడం విశేషం. కుటుంబ సభ్యుల సమక్షంలో కొత్త ప్రియురాలితో బర్త్ డే జరుపుకోవడం ద్వారా పాండ్యా ఈ బంధానికి ఎంత ప్రాధాన్యత ఇస్తున్నారో స్పష్టమవుతోంది. ఈ ట్రిప్‌కు వెళ్లే ముందు ముంబై ఎయిర్‌పోర్ట్‌లో ఈ జంట తొలిసారిగా మీడియా కంటపడింది.

ఎవరీ మహియికా శర్మ?
24 ఏళ్ల మహియికా శర్మ ఫ్యాషన్ ప్రపంచంలో ఓ ప్రముఖ మోడల్, సోషల్ మీడియా ఇన్‌ఫ్లుయెన్సర్. ఆమె దేశంలోని టాప్ ఫ్యాషన్ డిజైనర్లతో కలిసి పనిచేశారు. 2024 సంవత్సరానికి గాను ఇండియన్ ఫ్యాషన్ అవార్డ్స్‌లో 'మోడల్ ఆఫ్ ది ఇయర్ (న్యూ ఏజ్)' పుర‌స్కారాన్ని గెలుచుకున్నారు. టాప్ బ్రాండ్లయిన తనిష్క్, వివో, యునిక్లో వంటి వాటికి ఆమె ప్రచారకర్తగా వ్యవహరించారు. పలు మ్యూజిక్ వీడియోలు, షార్ట్ ఫిల్మ్స్‌లో కూడా మహియికా నటించారు.