నిందితుల తెలివితక్కువ పని. దుర్గాపూర్ మెడికో గ్యాంగ్‌రేప్ కేసును ఛేదించిన పోలీసులు

పశ్చిమ బెంగాల్‌లోని దుర్గాపూర్‌లో వైద్య విద్యార్థినిపై జరిగిన సామూహిక అత్యాచారం కేసులో పోలీసులు కీలక పురోగతి సాధించారు. ఈ దారుణానికి పాల్పడిన ముగ్గురు నిందితులను ఆదివారం అరెస్ట్ చేశారు. నిందితులు చేసిన ఒక చిన్న పొరపాటే ఈ కేసులో పోలీసులకు కీలక ఆధారంగా మారి వారిని పట్టించింది.

ఆదివారం అదుపులోకి తీసుకున్న ముగ్గురి వివరాలను పోలీసులు ఇంకా వెల్లడించలేదు. ఈ కేసులో మొత్తం ఐదుగురిని గుర్తించామని, పరారీలో ఉన్న మిగతా ఇద్దరి కోసం తీవ్రంగా గాలిస్తున్నామని అసన్‌సోల్-దుర్గాపూర్ పోలీస్ కమిషనరేట్ సీనియర్ అధికారి ఒకరు తెలిపారు.

ఫోన్ కాల్‌తో దొరికారిలా..
పోలీసుల కథనం ప్రకారం శుక్రవారం రాత్రి బాధితురాలు తన స్నేహితుడితో కలిసి బయటకు వెళ్లినప్పుడు మొదట కొంతమంది యువకులు వారి ఫోన్లను లాక్కున్నారు. కాసేపటికి మరో ఇద్దరు అక్కడికి వచ్చి, ఏం జరిగిందని ఆరా తీస్తూ సాయం చేస్తున్నట్లు నటించారు. ఈ క్రమంలోనే, బాధితురాలి ఫోన్‌కు తమ మొబైల్ నుంచి కాల్ చేశారు. ఈ ఫోన్ నంబర్ ఆధారంగానే పోలీసులు దర్యాప్తు వేగవంతం చేశారు. మొదట ఆ నంబర్‌కు సంబంధించిన వ్యక్తిని అదుపులోకి తీసుకుని విచారించగా, మిగతా నలుగురి వివరాలు తెలిశాయి.

అడవిలో డ్రోన్లతో గాలింపు
ఒడిశాలోని జలేశ్వర్‌కు చెందిన బాధితురాలు, దుర్గాపూర్‌లోని ఓ ప్రైవేట్ మెడికల్ కాలేజీలో సెకండియర్ చదువుతోంది. శుక్రవారం రాత్రి స్నేహితుడితో డిన్నర్‌కు వెళ్లగా, బైక్‌లపై వచ్చిన కొందరు యువకులు వారిని వెంబడించారు. స్నేహితుడిని బెదిరించి పంపించి, యువతిని సమీపంలోని అటవీ ప్రాంతంలోకి లాక్కెళ్లి అత్యాచారానికి పాల్పడ్డారు. ఈ ఘటన జరిగిన ప్రాంతం దట్టమైన అడవి కావడంతో అక్కడ సీసీటీవీ కెమెరాలు కూడా లేవు. దీంతో పోలీసులు బైక్‌లు, డ్రోన్ల సహాయంతో మిగతా ఇద్దరు నిందితుల కోసం గాలిస్తున్నారు.

ఈ ఘటనపై జాతీయ మహిళా కమిషన్ (ఎన్‌సీడబ్ల్యూ) తీవ్రంగా స్పందించింది. ఐదు రోజుల్లోగా నివేదిక ఇవ్వాలని బెంగాల్ డీజీపీని ఆదేశించింది. మరోవైపు, బాధితురాలు మేజిస్ట్రేట్ ముందు తన వాంగ్మూలాన్ని నమోదు చేసింది. విద్యార్థినికి పూర్తి అండగా ఉంటామని, పోలీసుల దర్యాప్తునకు పూర్తిగా సహకరిస్తామని కాలేజీ యాజమాన్యం ఒక ప్రకటనలో తెలిపింది.