రాయవరం బాణసంచా కేంద్రం పేలుడు ఘటన కలచివేసింది: సీఎం చంద్రబాబు

కోనసీమ జిల్లా రాయవరంలోని ఓ బాణసంచా తయారీ కేంద్రంలో జరిగిన ఘోర అగ్నిప్రమాదంపై ఆంధ్రప్రదేశ్ ముఖ్యమంత్రి చంద్రబాబు తీవ్ర దిగ్భ్రాంతి వ్యక్తం చేశారు. ఈ దురదృష్టకర సంఘటనలో పలువురు ప్రాణాలు కోల్పోవడం తనను తీవ్రంగా కలచివేసిందని తెలిపారు.

ఈ ఘటన తెలిసిన వెంటనే ఉన్నతాధికారులతో ఫోన్‌లో మాట్లాడి వివరాలు ఆరా తీశానని చంద్రబాబు వెల్లడించారు. ప్రమాదానికి గల కారణాలు, ప్రస్తుత పరిస్థితి, సహాయక చర్యల పురోగతిపై సమీక్షించినట్టు వివరించారు. సీనియర్ అధికారులు తక్షణమే సంఘటనా స్థలానికి చేరుకుని సహాయక కార్యక్రమాలను స్వయంగా పర్యవేక్షించాలని స్పష్టమైన ఆదేశాలు జారీ చేశానని తెలిపారు.

కాగా, ఈ ప్రమాదంలో గాయపడిన వారికి సాధ్యమైనంత ఉత్తమమైన వైద్య సేవలు అందించాలని ఆయన అధికారులను ఆదేశించారు. బాధితుల వైద్యానికి అవసరమైన అన్ని ఏర్పాట్లు చేయాలని సూచించారు.

ప్రమాదంలో సర్వం కోల్పోయిన బాధిత కుటుంబాలకు ప్రభుత్వం అండగా నిలుస్తుందని చంద్రబాబు భరోసా ఇచ్చారు. వారిని అన్ని విధాలుగా ఆదుకుంటామని హామీ ఇచ్చారు. మృతుల కుటుంబాలకు ఆయన ప్రగాఢ సానుభూతిని తెలియజేశారు.

రాయవరంలోని గణపతి గ్రాండ్ బాణసంచా తయారీ కేంద్రంలో జరిగిన ఈ దుర్ఘటనలో ఆరుగురు ప్రాణాలు కోల్పోయారు. మృతుల సంఖ్య ఇంకా పెరిగే అవకాశం ఉందని తెలుస్తోంది.