దసరా సర్‌ప్రైజ్ ఇచ్చిన సామ్.. 'కొత్త ప్రయాణం' వెనుక అసలు కథ ఇదేనా?

అగ్ర కథానాయిక సమంత దసరా పండగ సందర్భంగా తన అభిమానులకు ఓ ఆసక్తికరమైన అప్‌డేట్ ఇచ్చారు. 'కొత్త ప్రయాణం' అంటూ సోషల్ మీడియాలో ఓ ఫొటోను పంచుకోవడంతో నెట్టింట దీనిపై విస్తృత చర్చ మొదలైంది. కొంతకాలంగా ఆమె రెండో పెళ్లి చేసుకోబోతున్నారంటూ వార్తలు వస్తున్న నేపథ్యంలో ఈ పోస్ట్ మరింత ప్రాధాన్యత సంతరించుకుంది.

వివరాల్లోకి వెళితే... సమంత తాజాగా తన కొత్త ఇంట్లోకి అడుగుపెట్టారు. ఈ సందర్భంగా ఇంటి ముందు గోడపై తన పేరులోని మొదటి అక్షరాలతో 'SAM' అని డిజైన్ చేయించిన లోగో ఫొటోను అభిమానులతో పంచుకున్నారు. అయితే, ఈ ఇల్లు హైదరాబాద్‌లో కొనుగోలు చేశారా? లేక ముంబైలోనా? అనే విషయంపై ఇంకా స్పష్టత రాలేదు. ఆమె ‘కొత్త ప్రయాణం’ అని పేర్కొనడంతో ఇది తన వ్యక్తిగత జీవితానికి సంబంధించిన కొత్త అధ్యాయమేనని పలువురు భావిస్తున్నారు.

గత కొంతకాలంగా సమంత బాలీవుడ్ దర్శకుడు రాజ్‌తో ప్రేమలో ఉన్నారని ప్రచారం జరుగుతున్న విషయం తెలిసిందే. పలు కార్యక్రమాలకు వీరిద్దరూ జంటగా హాజరవడంతో ఈ వార్తలకు మరింత బలం చేకూరింది. 'ది ఫ్యామిలీ మ్యాన్ 2', 'సిటాడెల్' వంటి వెబ్ సిరీస్‌లకు వీరిద్దరూ కలిసి పనిచేశారు. ఆ పరిచయమే ప్రేమగా మారిందని, త్వరలోనే వీరు ఒక్కటి కాబోతున్నారని బాలీవుడ్ వర్గాల్లో గుసగుసలు వినిపిస్తున్నాయి. ఈ క్రమంలో సమంత కొత్త ఇంటి ఫొటో షేర్ చేయడంతో ఆ ప్రయాణం రాజ్ తోనేనా అని నెటిజన్లు చర్చించుకుంటున్నారు.

ఇక, సామ్‌ సినిమాల విషయానికొస్తే, ప్రస్తుతం 'రక్త్‌ బ్రహ్మాండ్‌: ది బ్లడీ కింగ్‌డమ్‌', 'మా ఇంటి బంగారం' అనే రెండు ప్రాజెక్టులతో బిజీగా ఉన్నారు. ఈ చిత్రాలు ప్రస్తుతం నిర్మాణ దశలో ఉన్నాయి.