అప్పటిదాకా విజయ్ పై కేసు నమోదు చేయం: డీఎంకే

తమిళనాడులోని కరూర్‌లో జరిగిన తొక్కిసలాట ఘటన రాజకీయంగా పెను దుమారం రేపుతోంది. 41 మంది ప్రాణాలు కోల్పోయిన ఈ దుర్ఘటనకు సంబంధించి నటుడు, తమిళగ వెట్రి కళగం (టీవీకే) అధినేత విజయ్‌పై కేసు నమోదు చేయకపోవడంపై విమర్శలు వెల్లువెత్తుతున్నాయి. ఈ ఆరోపణలపై స్పందించిన అధికార డీఎంకే ప్రభుత్వం, విచారణ పూర్తయ్యే వరకు ఎవరిపైనా చర్యలు తీసుకోలేమని స్పష్టం చేసింది.

డీఎంకే అధికార ప్రతినిధి టీకేఎస్ ఇళంగోవన్ గురువారం మాట్లాడుతూ.. ఈ ఘటనపై ఇప్పటికే మద్రాస్ హైకోర్టు రిటైర్డ్ న్యాయమూర్తి జస్టిస్ అరుణా జగదీశన్‌తో ఏకసభ్య కమిషన్‌ను ఏర్పాటు చేశామని గుర్తు చేశారు. "కమిషన్ తన నివేదికను సమర్పించిన తర్వాతే, ఈ ఘటనలో ఎవరిది తప్పో తేలుతుంది. ఆ తర్వాతే బాధ్యులపై చర్యలు తీసుకోవడం జరుగుతుంది" అని ఆయన వివరించారు. నిర్వాహణ లోపాల కారణంగా కొందరు అధికారులపై, అలాగే టీవీకే నేతలపై కేసులు నమోదు చేసిన విషయాన్ని ఆయన ప్రస్తావించారు.

అయితే, డీఎంకే ప్రభుత్వ వైఖరిపై వీసీకే పార్టీ అధినేత, ఎంపీ తిరుమావళవన్ తీవ్రంగా మండిపడ్డారు. పోలీసుల తీరు ద్వంద్వ ప్రమాణాలతో కూడి ఉందని ఆయన ఆరోపించారు. "టీవీకే ప్రధాన కార్యదర్శి బుస్సీ ఆనంద్‌పై కేసు నమోదు చేసినప్పుడు, కార్యక్రమాన్ని నిర్వహించిన పార్టీ అధినేత విజయ్‌ను, ఇతరులను ఎందుకు వదిలేశారు?" అని ఆయన సూటిగా ప్రశ్నించారు. ఇది పోలీసుల నిర్లక్ష్యానికి నిదర్శనమని విమర్శించారు.

సెప్టెంబర్ 27న కరూర్ బస్టాండ్ మైదానంలో విజయ్ నిర్వహించిన ర్యాలీలో భారీగా జనం తరలిరావడంతో తొక్కిసలాట జరిగింది. ఈ దుర్ఘటనలో 41 మంది చనిపోగా, 60 మందికి పైగా గాయపడ్డారు. ఈ ఘటనపై జాతీయ స్థాయిలోనూ ఒత్తిడి పెరుగుతోంది. బీజేపీ ఎంపీ, నటి హేమ మాలిని నేతృత్వంలోని ఎనిమిది మంది సభ్యుల ఎన్డీఏ నిజ నిర్ధారణ కమిటీ ఈ వారంలో కరూర్‌లో పర్యటించింది. బాధితుల కుటుంబాలను పరామర్శించిన ఈ బృందం, డీఎంకే ప్రభుత్వ వైఫల్యం వల్లే ఈ దుర్ఘటన జరిగిందని ఆరోపిస్తూ కేంద్ర దర్యాప్తునకు డిమాండ్ చేసింది.