సొంత నియోజకవర్గంలో హోంమంత్రి అనిత వాహనాన్ని అడ్డుకున్న మత్స్యకారులు

ఆంధ్రప్రదేశ్ హోంశాఖ మంత్రి వంగలపూడి అనితకు తన సొంత నియోజకవర్గంలోనే తీవ్ర నిరసన ఎదురైంది. అనకాపల్లి జిల్లా నక్కపల్లి మండలం రాజయ్యపేటలో ఏర్పాటు చేయతలపెట్టిన బల్క్ డ్రగ్ పార్క్‌కు వ్యతిరేకంగా స్థానిక మత్స్యకారులు పెద్ద ఎత్తున ఆందోళనకు దిగారు. సోమవారం గ్రామానికి వచ్చిన మంత్రి అనిత కాన్వాయ్‌ను అడ్డుకోవడంతో అక్కడ తీవ్ర ఉద్రిక్తత నెలకొంది.

గత 16 రోజులుగా బల్క్ డ్రగ్ పార్క్‌ను వ్యతిరేకిస్తూ రాజయ్యపేట మత్స్యకారులు నిరసన శిబిరంలో ఆందోళన చేస్తున్నారు. ఈ పార్క్ ఏర్పాటు వల్ల తమ సముద్ర తీరం కాలుష్యకాసారంగా మారుతుందని, ఇది తమ జీవనాధారమైన చేపల వేటను దెబ్బతీయడమే కాకుండా ప్రాణాలకే ముప్పు తెస్తుందని వారు ఆవేదన వ్యక్తం చేస్తున్నారు. "బల్క్ డ్రగ్ పార్క్ కంటే ఉరితాళ్లే మేలు" అంటూ ప్రభుత్వానికి వ్యతిరేకంగా నినాదాలు చేశారు.

ఈ క్రమంలో, ధర్నా శిబిరాన్ని సందర్శించేందుకు వచ్చిన మంత్రి అనితకు స్థానికులు ఊహించని రీతిలో నిరసన తెలిపారు. ఆమె ప్రయాణిస్తున్న మార్గంలో చెట్లను నరికి అడ్డంగా పడేసి కాన్వాయ్‌ను నిలిపివేశారు. దీంతో మంత్రి తన వాహనం దిగి ఆందోళనకారులతో మాట్లాడాల్సి వచ్చింది. ఈ ప్రాజెక్టును తూర్పు గోదావరి నుంచి తమ ప్రాంతానికి మార్చడంపై వారు తీవ్ర ఆగ్రహం వ్యక్తం చేశారు.

మత్స్యకారుల ఆందోళనపై స్పందించిన మంత్రి అనిత, వారి డిమాండ్లను ప్రభుత్వ దృష్టికి తీసుకెళతానని హామీ ఇచ్చారు. ఈ సమస్యపై ఒక కమిటీని ఏర్పాటు చేసి తగిన నిర్ణయం తీసుకుంటామని నచ్చజెప్పే ప్రయత్నం చేశారు. అయితే, మంత్రి హామీతో మత్స్యకారులు సంతృప్తి చెందలేదు. కమిటీలు, పరిశీలనలు కాదని, ప్రాజెక్టును పూర్తిగా రద్దు చేసే వరకు తమ పోరాటం ఆపబోమని స్పష్టం చేశారు. ప్రభుత్వం తమ డిమాండ్లను పట్టించుకోకపోతే ఆందోళనను మరింత ఉద్ధృతం చేస్తామని హెచ్చరించారు. ఈ ఘటనతో అనకాపల్లి జిల్లాలో బల్క్ డ్రగ్ పార్క్ అంశం మరోసారి చర్చనీయాంశంగా మారింది.