జైల్లో దుర్గా పూజ సందడి... ఖైదీలకు నాలుగు రోజుల పాటు అదిరిపోయే మెనూ!

పండుగ వచ్చిందంటే చాలు.. ప్రతీ ఇంట్లోనూ ప్రత్యేక వంటకాలతో సందడి నెలకొంటుంది. అయితే, ఆ పండుగ ఆనందాన్ని నాలుగు గోడల మధ్య శిక్ష అనుభవిస్తున్న ఖైదీలకు కూడా అందించేందుకు పశ్చిమ బెంగాల్ ప్రభుత్వం ముందుకొచ్చింది. దుర్గా పూజ సందర్భంగా రాష్ట్రంలోని అన్ని జైళ్లలో ఖైదీల కోసం నాలుగు రోజుల పాటు ప్రత్యేక మెనూను ఏర్పాటు చేసింది. ఈసారి వారి మెనూలో బిర్యానీతో పాటు చైనీస్ వంటకాలను కూడా చేర్చడం విశేషం.

ఈ ఏర్పాట్లపై రాష్ట్ర ప్రభుత్వానికి చెందిన ఓ సీనియర్ అధికారి ఆదివారం వివరాలు వెల్లడించారు. "పండుగ అంటే ఆత్మీయులతో కలిసి ఆనందంగా గడపడం. కానీ ఖైదీల జీవితం జైలు గోడలకే పరిమితమై ఉంటుంది. బయట ప్రపంచంతో వారికి సంబంధం ఉండదు. అందుకే, పండుగ వేళ వారికోసం ఈ ప్రత్యేక ఏర్పాట్లు చేశాం. ప్రతీ ఏటా దుర్గా పూజ సమయంలో వారి మెనూ మారుస్తాం. ఈసారి కూడా వారికి రుచికరమైన భోజనాన్ని అందిస్తున్నాం" అని ఆయన తెలిపారు.

నాలుగు రోజుల మెనూ ఇదే...

సోమవారం (సప్తమి) నుంచి గురువారం (దశమి) వరకు ఖైదీలకు పసందైన భోజనం అందించనున్నారు.
సప్తమి: మధ్యాహ్నం చేపల కూరతో భోజనం, రాత్రికి చికెన్ కర్రీ.
అష్టమి: ఉదయం పూరీ, మధ్యాహ్నం కిచిడీ, రాత్రి బెంగాలీ స్పెషల్ లూచీ వంటకం.
నవమి: మధ్యాహ్నం రొయ్యల కూరతో భోజనం, రాత్రి చికెన్ బిర్యానీ.
దశమి: మధ్యాహ్నం రోహు చేపల పులుసు, రాత్రి ఫ్రైడ్ రైస్, చిల్లీ చికెన్.

శాఖాహారుల కోసం వెజ్ బిర్యానీ, పన్నీర్, పెరుగు, ఐస్‌క్రీమ్ వంటివి ఏర్పాటు చేసినట్లు అధికారి వివరించారు. ఈ నాలుగు రోజులూ అందరికీ స్వీట్లు కూడా అందిస్తామన్నారు. ఉదయం అల్పాహారంలోనూ ఎగ్ టోస్ట్, చౌమీన్ వంటివి ఉంటాయని తెలిపారు.

ఖైదీల ఆధ్వర్యంలో పూజలు

మరోవైపు, రాష్ట్రంలోని జైళ్లలో ఖైదీలు స్వయంగా దుర్గా పూజలు నిర్వహిస్తున్నారు. ముఖ్యంగా ప్రెసిడెన్సీ కరెక్షనల్ హోమ్‌లో 'భిన్నత్వంలో ఏకత్వం' అనే థీమ్‌తో ఖైదీలు ఐక్యతా సందేశాన్ని ఇస్తున్నారు. పూజ థీమ్ ఆలోచన నుంచి మండపాల అలంకరణ వరకు అన్ని పనులను ఖైదీలే దగ్గరుండి చూసుకోవడం గమనార్హం.