డీఎంకే ఎంపీలకు స్టాలిన్ కీలక ఆదేశాలు

డీఎంకే పార్టీకి చెందిన లోక్‌సభ, రాజ్యసభ సభ్యులు వారంలో కనీసం నాలుగు రోజులు వారి వారి నియోజకవర్గాల్లోనే కచ్చితంగా బస చేయాలని ఆ పార్టీ అధినేత, తమిళనాడు ముఖ్యమంత్రి స్టాలిన్ స్పష్టమైన ఆదేశాలు జారీ చేశారు. ప్రజలతో మమేకమై వారి సమస్యలను అడిగి తెలుసుకుని, వాటి పరిష్కారానికి తక్షణ చర్యలు చేపట్టాలని ఆయన సూచించారు. చెన్నైలోని పార్టీ ప్రధాన కార్యాలయం ‘అన్నా అరివాలయం’లో డీఎంకే ఎంపీలతో నిర్వహించిన సమావేశంలో స్టాలిన్ ఈ కీలక వ్యాఖ్యలు చేశారు.

రాష్ట్ర ప్రభుత్వం నిర్వహిస్తున్న ‘ఉంగలుడన్‌ స్టాలిన్‌’ (మీతో స్టాలిన్), ‘నలమ్‌ కాక్కుం స్టాలిన్‌’ (ఆరోగ్యాన్ని కాపాడే స్టాలిన్) వంటి ప్రత్యేక శిబిరాల్లో ఎంపీలు తప్పనిసరిగా పాల్గొనాలని సీఎం ఆదేశించారు. ఆ శిబిరాలకు వచ్చే ప్రజల నుంచి వినతులను స్వీకరించి, వారి సమస్యలను పరిష్కరించడంలో చురుకైన పాత్ర పోషించాలన్నారు. ముఖ్యంగా, ప్రతిష్ఠాత్మక ‘కలైంజర్‌ మహిళా సాధికారత పథకం’ అమలు తీరును క్షేత్రస్థాయిలో పర్యవేక్షించాలని తెలిపారు.

ఈ పథకం కింద అర్హులైన గృహిణులకు ప్రతి నెలా రూ.1000 వారి బ్యాంకు ఖాతాల్లో జమ అవుతున్నాయో లేదో లబ్ధిదారులను స్వయంగా అడిగి తెలుసుకోవాలని ఎంపీలకు సూచించారు. అలాగే, ఈ పథకం కోసం కొత్తగా దరఖాస్తు చేసుకున్న వారి వివరాలను పరిశీలించి, వారి అర్హతలను నిర్ధారించుకుని తదుపరి చర్యలు తీసుకోవాలని స్పష్టం చేశారు.

ఇటీవల జరిగిన లోక్‌సభ ఎన్నికల్లో డీఎంకే కూటమి 39 స్థానాల్లో గెలుపొందడానికి మిత్రపక్షాల ఎమ్మెల్యేలు ఎంతో కష్టపడ్డారని స్టాలిన్ గుర్తుచేశారు. అదే స్ఫూర్తితో, వచ్చే ఏడాది జరగనున్న రాష్ట్ర శాసనసభ ఎన్నికల్లో డీఎంకే కూటమి అభ్యర్థుల విజయానికి ఎంపీలందరూ కృషి చేయాలని పిలుపునిచ్చారు. ఈ సమావేశంలో పార్టీ ప్రధాన కార్యదర్శి దురైమురుగన్‌, కోశాధికారి టీఆర్‌ బాలు, ఎంపీలు కనిమొళి, తిరుచ్చి శివ తదితర ముఖ్య నేతలు పాల్గొన్నారు.