మాటల్లేవ్.. చేతలే.. పాక్ ఆటగాళ్ల అతికి అర్ష్‌దీప్ సింగ్ అదిరే రిప్లై

భారత్, పాకిస్థాన్ మధ్య క్రికెట్ మ్యాచ్ అంటే కేవలం ఆట మాత్రమే కాదు, అంతకుమించి భావోద్వేగాల సమరం. ఇటీవల సరిహద్దుల్లో జరిగిన సైనిక ఘర్షణల వేడి, ఇప్పుడు దుబాయ్ వేదికగా జరిగిన ఆసియా కప్ 2025 సూపర్ 4 మ్యాచ్‌పైనా స్పష్టంగా కనిపించింది. ఈసారి మాటల తూటాలు పేలలేదు, కానీ ఆటగాళ్లు తమ సైగలతోనే యుద్ధ వాతావరణాన్ని సృష్టించారు. పాకిస్థాన్ ఆటగాళ్ల రెచ్చగొట్టే చర్యలకు, భారత బౌలర్ అర్ష్‌దీప్ సింగ్ తనదైన శైలిలో ఇచ్చిన సమాధానం ఇప్పుడు సోషల్ మీడియాలో సంచలనంగా మారింది.

ఈ నెల‌ 21న జరిగిన ఈ మ్యాచ్‌లో పాకిస్థాన్ ఆటగాళ్లు క్రీడాస్ఫూర్తిని మరిచి రెచ్చగొట్టేలా ప్రవర్తించారు. భారత అభిమానుల నుంచి "కోహ్లీ-కోహ్లీ" నినాదాలు వినిపించడంతో పాక్ పేసర్ హరీస్ రవూఫ్ అసహనానికి గురయ్యాడు. మే నెలలో జరిగిన సైనిక ఘర్షణల్లో ఆరు భారత యుద్ధ విమానాలను కూల్చివేశామన్న అహంకారంతో, మైదానంలో రెండుసార్లు విమానం కూలిపోతున్నట్లు సైగలు చేశాడు. మరోవైపు, పాక్ బ్యాటర్ సాహిబ్జాదా ఫర్హాన్ తన బ్యాట్‌ను ఏకే-47 తుపాకీలా పట్టుకుని భారత డగౌట్ వైపు గురిపెడుతున్నట్లు ప్రదర్శించాడు. ఈ చర్యలు తీవ్ర విమర్శలకు దారితీశాయి. పాకిస్థాన్ సైనికీకరణ, జిహాదీ మనస్తత్వం ఆ దేశ క్రికెట్ జట్టులోకి కూడా పాకిందనడానికి ఇదే నిదర్శనమని పలువురు అభిప్రాయపడ్డారు.

అయితే, పాకిస్థాన్ ఆటగాళ్ల ఈ అతి ప్రవర్తనకు భారత పేసర్ అర్ష్‌దీప్ సింగ్ గట్టి సమాధానం ఇచ్చాడు. హరీస్ రవూఫ్‌ను వెక్కిరిస్తూ, అర్ష్‌దీప్ కూడా విమానం కూలుతున్నట్లు చేసిన సైగలకు సంబంధించిన వీడియో క్షణాల్లో వైరల్‌గా మారింది. "అర్ష్‌దీప్ ఆలస్యంగా వచ్చినా, అదిరిపోయే కౌంటర్ ఇచ్చాడు" అంటూ నెటిజన్లు ప్రశంసలు కురిపిస్తున్నారు.

"ఆపరేషన్ సిందూర్" పేరుతో మే నెలలో జరిగిన సైనిక ఘర్షణల్లో భారత సైన్యం పాక్‌కు గట్టి షాక్ ఇచ్చిన విషయం తెలిసిందే. ఇప్పుడు క్రికెట్ మైదానంలోనూ అదే ఆధిపత్యాన్ని ప్రదర్శిస్తూ, పాక్ కవ్వింపు చర్యలకు సంయమనంతో సమర్థంగా బదులిచ్చి భారత్ పైచేయి సాధించింది. ఆటలోనే కాకుండా, ఈ సైగల యుద్ధంలోనూ టీమిండియానే విజయం సాధించిందని క్రీడా విశ్లేషకులు అంటున్నారు