ఆసియా కప్‌లో పాక్‌ ఆశలు సజీవం.. శ్రీలంకపై ఉత్కంఠ విజయం

ఆసియా కప్‌లో నిలవాలంటే తప్పక గెలవాల్సిన మ్యాచ్‌లో పాకిస్థాన్ అద్భుత విజయాన్ని అందుకుంది. మంగళవారం జరిగిన హోరాహోరీ సూపర్‌-4 పోరులో శ్రీలంకపై 5 వికెట్ల తేడాతో గెలుపొందింది. ఒక దశలో 80 పరుగులకే 5 వికెట్లు కోల్పోయి ఓటమి అంచున నిలిచిన పాకిస్థాన్‌ను.. నవాజ్ (38 నాటౌట్), త‌ల‌త్‌ హుస్సేన్ (32 నాటౌట్) జోడీ ఆదుకుంది. వీరిద్దరూ ఆరో వికెట్‌కు అజేయంగా 58 పరుగులు జోడించి జట్టుకు చిరస్మరణీయ విజయాన్ని అందించారు. ఈ గెలుపుతో పాకిస్థాన్ టోర్నీలో తమ ఆశలను సజీవంగా నిలుపుకుంది.

ఈ మ్యాచ్‌లో తొలుత బ్యాటింగ్ చేసిన శ్రీలంక నిర్ణీత 20 ఓవర్లలో 8 వికెట్ల నష్టానికి 133 పరుగులు చేసింది. పాక్ బౌలర్ల ధాటికి లంక బ్యాటర్లు పెవిలియ‌న్‌కు క్యూ కట్టారు. ముఖ్యంగా స్టార్ పేసర్ షాహీన్ అఫ్రిది (3/28) తన తొలి ఓవర్‌లోనే కుశాల్ మెండిస్ (0)ను పెవిలియన్ పంపి భారీ దెబ్బకొట్టాడు. ఆ తర్వాత కూడా లంక క్రమం తప్పకుండా వికెట్లు కోల్పోయింది. ఒక దశలో 58 పరుగులకే 5 వికెట్లతో పీకల్లోతు కష్టాల్లో పడింది. ఈ క్లిష్ట సమయంలో కమిందు మెండిస్ (50) కీలక అర్ధశతకంతో ఒంటరి పోరాటం చేశాడు. అతనికి కరుణరత్నె (17 నాటౌట్) నుంచి సహకారం అందడంతో లంక గౌరవప్రదమైన స్కోరు చేయగలిగింది. పాక్ బౌలర్లలో అఫ్రిదితో పాటు హుస్సేన్, రవూఫ్ రెండేసి వికెట్లు పడగొట్టారు.

అనంతరం 134 పరుగుల లక్ష్యంతో బరిలోకి దిగిన పాకిస్థాన్‌కు ఓపెనర్లు జమాన్ (17), ఫర్హాన్ (24) శుభారంభం అందించారు. తొలి వికెట్‌కు 45 పరుగులు జోడించి గెలుపును సులభం చేసేలా కనిపించారు. కానీ, స్పిన్నర్లు తీక్షణ (2/24), హసరంగ (2/24) విజృంభించడంతో పాక్ ఒక్కసారిగా కుప్పకూలింది. 35 పరుగుల వ్యవధిలో 5 కీలక వికెట్లు కోల్పోయి ఓటమి దిశగా సాగింది. అయితే, ఈ దశలో క్రీజులో నిలిచిన నవాజ్, హుస్సేన్ అద్భుతమైన సంయమనంతో ఆడారు. ఒత్తిడిని అధిగమిస్తూ లక్ష్యం వైపు అడుగులు వేశారు. మరో వికెట్ పడకుండా జాగ్రత్త పడుతూ 18 ఓవర్లలోనే జట్టును విజయ తీరాలకు చేర్చారు.

సంక్షిప్త స్కోర్లు:
శ్రీలంక: 20 ఓవర్లలో 133/8 (మెండిస్‌ 50, అసలంక 20, అఫ్రిది 3/28, హుస్సేన్‌ 2/18),
పాకిస్థాన్‌: 18 ఓవర్లలో 138/5(నవాజ్‌ 38 నాటౌట్‌, హుస్సేన్‌ 32 నాటౌట్‌, తీక్షణ 2/24, హసరంగ 2/27)